Spurs-in Saints boss an ban!

Tottenham Hotspur chuan Pathianni zan khan Southampton chu khualmualah 5-0 ngawtin an sawp a, Premier League table mawngphah luahtu Saints hian coach Russell Martin chu an ban zui.

Spurs tan James Maddison chuan goal hnih khungin, Son Heung-Min, Dejan Kulusevski leh Pape Matar Sarr te chuan goal khat ṭheuh an khung bawk a, St. Mary's Stadium-ah mualneitu team-in a chhanletna tur an nei lo.

Southampton-in an tuar thei ta ngang lo a, Premier League kaipuitu coach Martin an ban zui. Kum 38 mi coach hian season hmasa khan Saints hi a enkawl ve chauh a, playoff final-ah Leeds United hnehpuiin, English top flight league a hruai kai.

Mahse, Premier League-a match 16 khelh tawhah vawi khat chiah a la chakpui a, vawi 13 tlawmin, vawi hnih draw an nei a, point nga chiah an la nei - season thara EPL khelh chhunzawm tur chuan thil mak an mamawh tel der tawh.

Saints chuan, "Russell leh a staff-te chungah, thla 18 zet, khelmual chhung leh pawna rim taka an hnathawh avangin lawmthu kan sawi a, Southampton nena inkungkaihna nei zawng zawngte chuan, season hmasaa hun duhawm tak, a bik takin May thlaa playoff final-a kan chak kha kan hre reng dawn a ni," an ti.

Southampton hian Under-21 coach Simon Rusk kaihhruaina hnuaiah an khel lailawk dawn a, Nilaini zan dar 1:30 hian Carabao Cup quarterfinal-ah Liverpool an mikhual ang - Martin ban a nih hma hian Wolverhampton Wanderers chuan an coach Gary O'Neil an ban ve bawk.