Champion tum lo, champion hnaih Chelsea!

Chelsea boss Enzo Maresca-a'n champion tura an la inpeih loh thu sawi ṭhin mah se, Brentford lakah Blues chu 2-1 in hnehna a chanpui leh ta a, hmahruaitu Liverpool chu point hnih chauhin an phak lo tawh - match khatin an khel tam thung.

Blues tan Marc Cucurella leh Nicolas Jackson ten goal khat ve ve an khung a, minute 90-naa Bryan Mbeumo-a goal khung chu a team tana phurna thlen turin a tlai mah mah tawh.

Chelsea lawm erawh a kim lo - Cucurella hi hun tawp ham rik a rik hnuah a yellow card pahnihna pek niin, hnawhchhuah a ni a, Blues tana result danglamna thlen phak erawh a ni tawh lo.

Kha le Blues

Stamford Bridge-a inkhel an nih avangin Chelsea an chak ngei a rinawm sa - first half tawp nan minute hnih chiah a awm tawh tihah goal hmahruai an khung a, Noni Madueke siamsak chu Cucurella chuan May 2022 hnua a goal hmasa ber ni turin a khung.

Blues hian goal dang khung leh tur erawhin hun an mamawh. Minute 80-naah Maresca hnuaia harhtharna chang Jackson a inlar a, Enzo Fernandez siamsak chu um lutin, goal-ah a chantir - tun season-a a goal kuana a ni.

Chelsea an chak dawn tih a chiang tawh a, mahse, Brentford an la beidawng bik lo. Season duhawm tak hmangtu Mbeumo chuan tun season-a a goal 10-na chu minute 90-naah a khung ve leh a, Stamford Bridge-a thawhleh nan erawh a tlai ta hret.

Champion a hnai

Blues hian league match nga zet chu a zawnin hnehna an chang ta a, Liverpool an um zel - heti chung hian coach Maresca erawh a ṭawng uang duh lo a, Italian coach hian a naute an phur sual ang tih a hlau niin a lang.

Maresca chuan, "Kan chak zat sawi a ngai lo a, a nihna taka thil kan thlir a ṭul. Hmasawnna tur kan la neih nual avangin kei chuan champion turin kan la inpeih lo ka ti tlat a ni.

"Fan-te chuan an duh leh champion chu lo beiseiin, an ngaihtuahna pawh lo seng rawh se. Mahse, a squad ang chuan, player leh coaching staff te chuan thil nihna tak kan thlir a ṭul," a ti a, champion a la sawi ri duh lo.