Delhi tan Rohminga'n goal a khung

78th National Football Championship for Santosh Trophy 2024-25 chu December 14, Inrinni aṭang khan Deccan Arena, Hyderabad-ah khelh ṭan a ni a, inelna hnuhnung ber semifinalist Mizoram erawh tun ṭum inelna final round-ah an tel pha lo thung.

December 15, Pathianni zan khan Delhi-in Odisha 2-0 in an hneh a, Mizo tlangval Rohmingthanga'n corner aṭangin a tauh lut. Aizawl FC tana khel ṭhin Mission Veng tlangval Rohminga hian season liam ta khan Sudeva a zawm a, club tana a khelh ṭhat avangin Delhi tana khelh tura koh a ni.

Delhi hian final round thleng turin qualifying round-ah Uttarakhand, Haryana leh Chandigarh te chu an hneh vek a, Rohminga hian hmun pawimawh a chang. Vawiin chawhnu dar 2:30 hian Delhi-in Tamil Nadu an hmachhawn leh ang.

Rohminga bakah hian Santosh Trophy final round-ah Mizo pahnih dang an la tel a, champion lai Services-ah Zothanpuia (Thangpuia) leh Emanuel Lalchhanchhuaha te an tel. Services hian match hmasa berah Manipur hneh lo mah se nimin chawhma khan Jammu & Kashmir chu 4-0 in an sawp.

Match hmasa pahnihah Thangpuia a khel tluan ve ve a, J&K an hneh ṭumin NorthEast United midfielder hlui Emanuel pawh bench aṭangin a lut bawk. Final round-ah hian team 12 chu group hnihah paruk ve vein an inṭhen a, group khat aṭangin a sang paliin quarterfinal an lut ang.