Leganes lakah Barcelona an tlawm

Barcelona an che fuh lo leh ta - an elpui Real Madrid chetsual karah Catalan club hian dinhmun sawhngheh theihna remchang ni mah se, an mikhual Leganes lakah 1-0 in an chak lo.

Pathianni zan Lluis Companys Olympic Stadium-a inkhelah goal khat chauh kan hmu, minute lina lekah Leganes defender Sergio González chuan a tauh lut a, ball chang tam leh inkhel thununtu Barcelona lamin an chhanglet thei lo a ni.

Hansi Flick-a nauten ball possession 81% tehmeuh an nei a, goal khung tumin ṭum 20 tehmeuh an pet bawk. Mahse, striker ṭha Robert Lewandoski bakah amah thlawptu Raphinha leh Lamine Yamal ten match dang angin goal an khung thei tlat lo.

Inkhelh banah Flick-a'n chanchinbu mite a hmachhawn lo a, assistant coach Marcus Sorg chuan, "Hun remchang leh ṭha vawi tam tak kan insiam thei a, mahse kan chhawr thei tlat si lo kha a buaithlak lai chu a ni.

"Inkhel thunun tak chung sia chak lo zawk nih hi a hrehawm a, pawmthiam a harsa kan ti em em bawk. Chutihrualin, kan duh emaw duh lo emaw pawh ni se kan chak lohna hi kan pawm a ngai a, insiamṭhat kan tum ang.

"Kan hma lawkah match hautak a awm tih kan hria, chumi hmachhawn tur chuan inbuatsaih nghal kan ngai dawn a ni, hahchawl hman kan ni lo," a ti. Inrinni zan hian Atletico Madrid an mikhual dawn a, kumin atana an match hnuhnung ber a ni tawh dawn a ni.

Barcelona hian La Liga match 18 aṭanga point 38 hmuin hma chu an la hruai tho a, mahni aia match khata khel tlem zawk Atletico Madrid nen an point hmuh zat a inang, kar tawp an inkhelh tur hi table hmahruaitu ni chunga Krismas leh kum thar hman leh hman lo hriltu a ni ang.