Point sarihin PSG an sang fal

Paris Saint Germain chuan Pathianni zan khan an mikhual Lyon chu 3-1 in an hneh. Luis Enrique naute hian Ligue 1 season kal laiah an mahni hnaih bertu Marseille aiin point sarihin an hmu tam mek a ni.

Paris khawpuia inkhelah PSG tan hian Ousmane Dembele chuan minute riatna lekah goal a khung a, midfielder Vitinha chuan penalty aṭangin a belh bawk, minute 14 an khelh tlin chuan Paris club dinhmun a ṭha.

Mahse, chawlhlawk hma deuhin Georges Mikauradze chuan si phurh sut ṭhenin Lyon beiseina a siam thar a, inkhel chawlhnu lamah na takin an nawr let bawk a, hun tawp dawng thlengin an ṭang thei.

Amaherawhchu, anmahni mualah PSG an chesual ṭha duh lo, goal khat an chhuah hnuah tlarhnung rem phuiin, hun tawp hma hretin Gancalo Ramos chuan an chak nemnghehna a khung belh bawk.

PSG manager Enrique chuan, "Chawlhkar tawp danglam tak a ni a, league table lamah a sang zual team pakua zingah PSG chiahin hnehna kan chang, midang an chetsual laia che fuh bik kan ni hi a pawimawh.

"A zawna match 10 chhung tlawm tawh lo Lyon nen kan inkhel a ni a, inrintawkna an ngahin hmachhawn kha an awlsam lo hle. Goal kan chhuah kha tuar thei dinhmunah pawh kan ding hman, mahse kan insiamṭha thei lai kha a pawimawh," tiin a sawi.

PSG hian Nilaini zanah league match khel turin AS Monaco an lenchilh dawn a, kumin atana an match hnuhnung ber ni turin December 22, Pathianni zanlaiah Lens nen French Cup an khel leh bawk ang.