Mumbai City an chak

Tun season-a beisei phak lo Mumbai City an chak ve leh ta a, lei rem an rap ṭan mek - Pathianni zan khan an mikhualna ramah Mohammedan SC chu 1-0 in an hneh a, Vikram Partap Singh chuan inkhela goal awmchhun hi a khung.

Kolkata khawpuiah Mumbai an vannei - minute 35-naah Mohammedan player Mohammed Irshad chuan Brandon Fernandes laka a foul avangin a yellow card pahnihna a hmu a, hnawhchhuah a ni.

Mohammedan tana goalkeeper Bhaskar Roy chetsual zarah Mumbai captain Lallianzuala Chhangte chuan chance duhawm a nei a, Roy hian a hmaa ding LZa chu ball hi a pe. Mahse, Lunglei tlangval hian goal zawnah a pet thei lo a, uiawm takin a hlah.

Kolkata club tan Zodingliana Tochhawng, Joe Zoherliana, Vanlalzuidika Chhakchhuak leh Lalremsanga Fanai ten inkhel bul an ṭan a, Mumbai tan LZa bakah Hmingthanmawia Ralte (Valpuia) chuan inkhel bul ṭanin, Daniel Lalhlimpuia chu bench aṭangin a lut bawk.

Nizanah ISL inkhel awm loin an chawl a, zanin dar 7:30-ah East Bengal chuan Punjab FC an mikhual ve leh ang.