Roma hneh thei Fabregas-a enkawl Como

Cesc Fabregas kaihhruaina hnuaia Serie A kheltu Como chuan Pathianni zan khan AS Roma chu 2-0 in an hneh - September thla khan Atalanta an lo hneh tawh bawk a, team lian lakah huaisen takin an khel chhuak ṭhin.

Como khelmualah hian goal kan hmu har hle, a hmasa zawk pawh Alessandro Gabrielloni chuan injury time minute thumnaah a khung chauh a, hun tawp hma chiahin Nico Paz chuan an goal hnihna a khung bawk.

Spanish manager Fabregas chuan, "A nihna tak sawi chuan match ṭhenkhatah hi chuan kan khelh dan leh ruahman lawksa dan hi kan chak pui a ni ber lo, kan rilru puthmang leh team tana kan inpekna hi a chak pui theih.

"Keini chu Como kan ni a, tuna kan game ang kha season hmasa khan ka lo hmu tawh ṭhin, a tir aṭanga a tawp thleng maia chak duh ka naute inkhel kha hmuhnawm ka ti, hetiang boruak hi neih reng ka duh," tiin a sawi.

Inkhel dangah AC Milan chu an mikhual Genoa nen 0-0 in an inhnehtawk - Milan hian an club kum 125 tlin an lawm a, stadium chhungah a lawmna thuziak lian takin an tarlang a, mahse an duh ang result erawh an hlawh chhuak thei ta lo.