League Cup quarterfinal : Arsenal mikhual tur Crystal Palace

Carabao Cup quarterfinal-ah zanin dar 1:00 hian Arsenal-in Crystal Palace an mikhual dawn. Gunners hian tun kartawp Inrinni zan dar 11:00 hian Premier League-ah Palace hi an hmachhawn lehnghal bawk ang.

Mikel Arteta hnuaiah Arsenal-in Premier League nomawi an beisei ṭhin a, season hnuhnung pahnihah hun ṭha an bawhpelh tawh. Tun season-ah pawh champion rinkai ni mah se Krismas em pawh thlen hmain champion tura ringtu an kiam leh ṭan.

Chutihrualin Gunners tan insiamṭhat nan khua a la tlai lo a, League Cup nomawi chawi theih hi Premier League atana inrintawkna neihna ṭha tak a ni thei ang. Arteta hnuaiah Arsenal-in FA Cup nomawi an chawi tawh a, League Cup hi an la chawi lo.

A ṭha ber dawttu

Arsenal-in quarterfinal lut turin Bolton Wanderers (5-1) leh Preston North End (3-0) te an hneh a, an khingpui an ṭhat tawk loh bakah League Cup a nih miau avangin an ṭhat dan berin an khel lo.

Crystal Palace lakah pawh hian an ṭhat theih dan berin an khelh a rinawm lo zawk a, chutihrualin Arteta-a'n hnehna chan ngei a tum ang. Gunners hi kartawp khan Everton nen goal awm loin an inhnehtawk a, tlarhma lam inenfiah an mamawh hle.

Tlarhmaa awm Kai Havertz mawhphurhna a sang a, mah se German forward hian mamawh hunah goal a keng tel ṭhin lo. Out and out striker hi Arsenal tlak chham niin a ngaih theih a, chutihrualin January transfer hun pawh lo thleng se an neihsa aia ṭha lak mai tur an awm loh avangin an neih ang tah hriam a pawimawh ang.

Zanina Palace an hmachhawn hunah Havertz aia Gabriel Jesus a inlan a nih pawhin a mak lo a, Raheem Sterling leh Leandro Trossard te pawh bul ṭantu zingah an tel thei bawk.

Palace an duai lo

Crystal Palace hian quarterfinal thleng turin Norwich City (4-0), QPR (2-1) leh Aston Villa (2-1) te an hneh a, tun hnaiah an result a ṭha bawk.

Oliver Glasner hote hian kartawp khan Brighton 3-1 in an hneh a, hemi hma hian Manchester City chu 2-2 in an chelh. Hei chauh hi a ni lo, match hnuhnung pangaah chak loh an nei tawh lo.

Palace hian Europe inelna an hmachhawn ve loh avangin Glasner-a'n team ṭha ber a khelhtir ngam dawn a, Gunners tan an tawh a khirh ang. Danglamna thlen thei Ismaila Sarr leh Eberechi Eze te awm mah se an inkhelhna tur hmun hi Emirates Stadium a ni a, Gunners erawh buk rit zawk an la ni fan ang.

Liverpool khingpui tur coach nei lo Saints

Southampton-in Tottenham 6-0 zeta an hneh loh avangin an coach Russell Martin an ban a, coach nghet an neih hmain zanin dar 1:30 hian Liverpool an mikhual dawn. Reds hi Premier League hmahruaitu an nih bakah League Cup champion lai leh champion ngun ber an ni.

Saints hi Under 21 head coach Simon Rusk-a'n a enkawl rih dawn a, hmabak a harsa nghal dawn hle. Russell Martin kaihhruaina hnuaiah Cardiff City (5-3), Everton (1-1, Pen 6-5) leh Stoke City (3-2) te hnehin quarterfinal an lut. Southampton hian kartawpa Arsenal chelh theitu Toffees hneh thei mah se tun hnaia an result a chhuanawm lo hle.

Match hnuhnung pangaah Saints hian goal 15 an chhuah a, Liverpool pawh hi an mualah hmachhawn mah se vanneihna tel lo chuan hnehna chan a har ang.

Reds erawh kartawpah Fulham-in chelh mah se player 10-in hun rei zawk an khel a, inkhel thunun chungin point khat an hlawh chhuak. Arne Slot-a'n kartawpah Tottenham a hmachhawn dawn avangin player ṭha ber a luhtir rinawm lo mah se semifinal an thlen theih tho a rinawm.

Slot-a'n inelna a thliar hrang thiam a, last 16-a Brighton an hneh ṭum pawhin player khel tlem zawkte khelhna hun ṭha a pe a tih theih. Alisson Becker dam tawh mah se goal veng turin Caoimhin Kelleher a chhawr a rinawm a, left back Andy Robertson hrem a nih avangin tlarhnung pawh an siksawi hret ang. Midfied lamah pawh Wataru Endo leh Alexis Mac Allister te inlan tura ngaih a ni a, tlarhmaah Diogo Jota a beisei theih bawk ang.

Dutch manager Slot-a'n Premier League leh Champions League inelna te a ngai pawimawh a, amaherawhchu League Cup nomawi chawi theih reng lai a, en liam mai erawh a tum lo khawp ang.