Zanin dar 7:00-ah Aizawl FC Vs Real Kashmir

Mizo hlanga khel Aizawl FC-in zanin dar 7:00 hian RG Stadium, Mualpuiah Real Kashmir an mikhual dawn. Mizo club hian an match hnuhnung pahnihah Namdhari leh Rajasthan United te an hneh loh avangin table-ah 10-naah an awm mek. Tun season I League-ah hian table mawngphaha awm an relegate ang.

Aizawl FC tan kumina an match hnuhnung ber tur a ni a, Krismas leh kumthar nuam taka an hman theih nan zanina chak hi a pawimawh hle. Mizo club hian nakkum January 9, Ningani zanah Sreenidi Deccan nen kum 2025 atana an match hmasa ber an khel leh chauh ang.

Ramsanga telna

Real Kashmir hian match hnuhnung berah Namdhari 1-0 in hneh lo mah se hemi hma match liah tlawm nei loin point riat an hlawh chhuak tawh.

Snow Leopards hian Aizawl FC aṭangin Lalramsanga an la lut a, ani hi Inter Village Football-a Champhai Kanan champion puitu leh best player kha a ni. Ramsanga bakah hian Mizo tlangval Lalramdinsanga Ralte a awm bawk.

Mizo player pahnih hian Real Kashmir-ah hmun pawimawh an chang pha a, foreigner panga an neih bawk avangin team ṭha zinga mi an ni.

Tlarhmaah Brazilian forward Paulo Cézar a awm a, Ghanaian midfielder pahnih Idan Ocran leh Kamal Issah bakah Cameroonian defender Bouba Aminou leh Congolese defender Ramazani Tshimanga te an awm bawk.

Tlarhnung pawp

MPL11-a Aizawl FC champion theihna chhan chu an tlarhnung phui ṭhat vang a ni a, I League match hmasa pahnihah pawh Mizo club-in goal an chhuah lo. Mahse, match hnuhnung pathumah erawh goal ruk an chhuah a, Aizawl FC-in tlarhnung an tihphui ṭhat a ngai.

Rajasthan United an hneh loh ṭumin captain Lalchhawnkima hnawhchhuah a ni a, KimKima hian Real Kashmir a hmachhawn thei lo. Defensive midfielder Lalthankhuma (TK-a) pawhin yellow card vawi li a hmuh tawh avangin an inlan thei dawn lo bawk.

Kimkima thlak nan Lalruatthara a awm thei a, MPL11 best player TK-a thlak a harsa dawn. Harsatna belhchhah turin Rajasthan an hneh loh ṭuma inhliam Lalawmpuia Sailo chu nimin thleng khan training a la zawm lo.

Coach Victor Lalbiakmawia chuan, "Table en chuan eng team pawh an intluk tawk tih a lang a, khelh ṭhat niah chuan tute pawh inhneh vek thei a ni. Real Kashmir pawh hi team ṭha ni mah se result ṭha kan neih hi a pawimawh a, player hliam leh hrem nei mah ila, point hmuh dan tur kan zawn a ngai a ni," tiin Vanglaini a hrilh.

Tlarhma lamah Aizawl FC tan Augustine Lalrochana a khel ṭha ṭhin a, an goal bawh a nat lehzual theih nan MPL11 best forward Lalbiakdika'n hma a sawn leh hret a ṭul.

Chutihrualin Aizawl FC hi Mizo hlanga khel an nih miau avangin eng team pawh hmachhawn se, point thum hlawh a harsa dawn. Hei vang hian ṭum dang zawng aiin Mizo club-in Mizo mipui ṭawiawmna an mamawh a, player 12-na mipui an chet chhuah ṭhat chuan Aizawl FC tan point thum hlawhchhuah a beisei theih ang.