Brazil football president chuh tum Ronaldo

Brazil legend Ronaldo Nazário-a'n an rama football thuneitu sang ber Brazilian Football Confederation (CBF) president chuh a tum thu a puang.

Kum 48 mi Ronaldo chuan, "President nih châk chhan hi 100 chuang ka nei a, chung zinga langsar ber chu kan national team zah kai ni phaka din thar leh a ni. Tunah chuan zah kai an ni phak tawh lo," tiin a sawi.

Khawvela striker ṭha bera mi ṭhahnem takin an chhal Ronaldo hian Brazil hi 1994 leh 2002 khan FIFA World Cup-ah a champion pui. CBF election erawh kum 2026-ah neih a ni chauh dawn a, tuna president ni lai hi Ednaldo Rodrigues a ni.

Spanish club Real Valladolid neitu zingah Ronaldo hi a tel a, neitu nihna hi hralh a tum mek. Barcelona, Inter Milan leh Real Madrid striker hlui chuan, "Kan indawr mek a, kan hralh thei ṭep. President ka chuhna kawngah min dal lo ang," tiin a sawi.

Ronaldo hian Brazilian club Cruzeiro neitu nihna 90% pawh a nei ṭhin a, kumin kumtir lam khan neitu nihna hi a hralh tawh bawk.