Swedish Player of the Year Gyokeres

Sporting Lisbon striker Viktor Gyökeres chuan Swedish Player of the Year 2024 a dawng. Guldbollen (Golden Ball) hi Swedish Football Association thlan a ni a, kum tina pek ṭhin niin Zlatan Ibrahimovic chuan vawi 12 dawng tawhin, a dawng hnem ber.

Kum 26 mi Gyokeres tan erawh a vawi khat dawnna a ni a, Sporting Lisbon leh Sweden tana a chet ṭhat avangin chawimawina hi a phu hle. Gyokeres hian kuminah match 60 khelin goal 61 a khung tawh.

Tun season bikah ringawt pawh Gyokeres hian Sporting tan match 24 aṭangin goal 26 a khung a, club lianin an ngaihven hle. Chutihrualin Portuguese club a zawm hma chuan Gyokeres hi a langsar bik lo a, Brighton & Hove Albion-ah khelh phak loh avangin loan-in a chhuak ṭhin. Seagulls aṭangin Coventry a pan a, 2022-23 season khan Championship-ah match 46 aṭangin goal 26 a khung a, goal a khung theih avangin Sporting a zawm theih phah a ni.