African player zingah Lookman a thiam ber!

Confederation of African Football (CAF) Awards chu Thawhṭanni zan khan sem a ni a, Nigeria leh Atalanta forward Ademola Lookman chu African mipa player zinga ṭha berah thlan a ni.

Lookman hian he dinhmun luah tur hian Brighton & Hove Albion winger Simon Adingra (Ivory Coast), Borussia Dortmund striker Serhou Guirassy (Guinea), Paris Saint-Germain fullback Achraf Hakimi (Morocco) leh South African club Mamelodi Sundowns keeper Ronwen Williams (South Africa) te a khum.

Kum 2023 khan khatihlaia Napoli striker Victor Osimhen chuan he award hi a lo dawng tawh a, Nigerian player-ten a zawnin Africa-a player thiam ber dinhmun an chelh tihna a ni.

Hmeichhe lamah Orlando Pride striker Barbra Banda chuan Player of the Year dinhmun a luah a, Zambian hmeichhe zinga he award dawng hmasa ber record a siam ve bawk.

Lookman a langsar

Kum 27 mi Lookman hian Charlton Athletic aṭanga a professional zinkawng zawh ṭanin, Everton, RB Leipzig, Fulham leh Leicester City tan pawh a lo khel tawh a, a hming chherna tak erawh kum 2022-a a zawm Atalanta an ni.

Atalanta forward hian season hmasa khan inelna hrang hrangah match 45 khelin goal 17 a khung a, assist vawi 10 a nei. Europa League an champion theih nan player thawhhlawk a ni a, final-a Bayer Leverkusen an hnehna inkhelah hattrick a siam!

European club final-a hattrick siam thei parukna a ni a, kum 1975 hnua a hmasa ber a ni - tun season-ah pawh a chet ṭhat chhunzawmin, match 19 a khelh tawhah goal 11 khungin, assist vawi nga a nei leh der tawh.

England-a piang, age level-a Three Lions tana inlan, senior team-a Nigeria tana inlan Lookman hian AFCON 2023 final-ah Nigeria chu hruai thlengin, goal thum a khung a, team of the tournament-ah a tel. Kumin Ballon d'Or shortlist-a African player lang awm chhun a ni a, 14-na a ni.

Award dang

Young Player of the Year atana thlan, attacking midfielder Lamine Camara hi kum 20 mi chauh la ni mah se, Senegal tan match 23 a khel der tawh a, goal ruk a khungsak - French club lar AS Monaco tan a khel mek.

Camara hian season hmasaah khan Monaco tan match 34 khelin goal hnih a khung a, assist vawi nga a nei. Tun season-ah inelna hrang hrangah match 18 khel tawhin goal hnih a khung a, assist vawi hnih a nei bawk.

Hmeichhe footballer ṭha bera thlan Barbra Banda hian season hmasa khan Orlando Pride chu US hmeichhe league National Women's Soccer League (NWSL) ah goal 17 khungin a champion pui a, Most Valuable Player-ah thlan a ni.

Thla hmasa lawk khan BBC chuan Women's Footballer of the Year-ah a thlang a, Paris Olympics-ah khan Zambia tan goal li khungin, Olympic-ah vawi hnih inlan tawhin, goal 10 a khung tawh a, Olympic-a African hmeichhia goal khung hnem ber a ni mek.