Antonsen hmachhawn a harsa - Shi Yuqi

BWF World Tour Finals khelh zawh taka mipa champion Shi Yuqi chuan a khingpui Anders Antonsen chu paltlang harsa a tih thu a sawi a, harsa taka nomawi a vuak chhuah thu a sawi bawk.

Ranking sang zual pariat inelnaah hian Viktor Axelsen a inlan thei lo a, mahse Axelsen ang thoa Denmark tlangval Antonsen chuan final a lut. Amaherawhchu, nomawi inchuhna inkhelah Chinese tlangval lakah 21-18, 21-14 in a chak lo.

Kum 28 mi Shi Yuqi chuan, "Mahni rama inkhel ka nih avangin ka tan boruak a nuam a, court sir aṭanga min thlawptute au thawm khan chakna min pek bakah nasa takin min tiphur bawk.

"European player tharum ngah leh vaw na tak tak hmachhawn hi a awlsam ngai lo a, tun ṭumah pawh khan a nihna takah chuan chetsual a hlauhawm thei hle, khawi hmunah pawh khan a lo awm hman emaw tih mai tur a ni a, a tawpah erawh a vannei zawkah ka ṭang," a ti.

Point chauh en chuan Shi Yuqi hi harsa vak loa chak niin a ngaih theih, mahse Chinese tlangval hian hnehna chang turin minute 52 chhung hun a mamawh a, game hnih khelh nan chuan a rei viau, an inkhel tawk tih a chiang.

Hmeichhe inelna lamah Wang Zhiyi leh Han Yue te an inkhel tawk takzet a, darkar khat leh minute 14 an inkhelh hnuah Wang Zhiyi hi 19-21, 21-19, 21-11 in a vannei zawkah a ṭang.