Inter Milan-in goal an sur tir

Serie A champion lai Inter Milan chuan an nomawi hloh mai an tum lohzia chu a takin an lantir, an mikhualna ramah Lazio chu 6-0 tehmeuhin an sawp a, an chunga awm Atalanta leh Napoli te an um zel.

Thawhṭanni zan Stadio Olimpico-a inkhelah, first half tawp dawnah Hakan Calhanoglu chuan penalty aṭangin goal a khung ṭan a, chawlhlawk hma chiahin Federico Dimarco chuan an goal hnihna ni turin a volley lut bawk.

Inkhel chawhnu lamah erawh mikhual Inter Milan hian a khat mawi tawkin goal an khung deuh reng - Nicolo Barella, Denzel Dumfries, Carlos Augusto leh Marcus Thuram te chuan goal khat ṭheuh khung belhin an chak chiang hle.

Inter Milan hian Serie A match 15 aṭangin point 34 hmuin pathumna an ni mek a, an chungah hian point 35 neitu Napoli leh Atalanta (37 points) te an awm a, an chunga mi pahnih te hian match khatin an khel tam thung - Inter tan nomawi a la hla lo hle tihna a ni.

Inter manager Simone Inzaghi chuan, "Mite duhthusam leh beisei ang vekin season kan hmang lo tih ka hria, pawn lam aṭanga sawiselna pawh kan dawng, a chhanletna ṭha ber chu tum ṭuma kan khelh dan hi a ni ngei ang.

"Ka naute kha hnehna chan chakin an tuihal a, a tir aṭang khan chawlh zai reng an rel lo. A tir lam minute 20 chhung khan kan khelh dan phung kan sawhnghet a, a hnu lamah chuan kan tan hna a awlsam phah ta deuh," a ti.

An insiamṭhat thu sawi zuiin Inzaghi chuan, "Bayer Leverkusen lakah khan ṭha takin kan inbuatsaih a, mahse kan duh ang result kan nei lo, a hma aia nasa lehzual zawkin kan thawkrim a, a rah kan hmu ta.

"September thla khan AC Milan kan hneh lo, a hnu lamah kan chetsual leh hun changa min sawisel châktu an tam tih ka hria, chumi chuan min ti ṭang lehzual a, result ṭha zawk kan neih theih phah," a ti.

Serie A bikah Inter Milan hian a zawnin khualmualah goal nga an khung tling - Lazio an sawp hma hian November thla tawp lamah khan Hellas Verona chu 5-0 in an lo hneh tawh bawk, hetiang an tih theih vawi khatna a ni hial.

Lazio erawhin chanchin duhawm lo an nei, kum 1950 daih tawh khan anmahni mualah hian Fiorentina chu 5-0 in an hneh lo a, chumi hnuah anmahni khelmuala an tlawm chian leh ber ṭum an tawng.

Lazio manager Marco Baroni chuan, "Kan team leh fan-te hrehawm tihna leh lungawi lohna ka hriatthiam pui, kan chet chhiat chhana mawhphurtu chu keimah ka ni a, chinfel dan ka zawng chhuak tur a ni.

"Goal ruk kan chhuah avang hian kan chhe ta duai e tihna erawh a ni bik lo, match tam tak kan khelh zinga pakhatah kan chesual ve mai chauh a ni," tiin a sawi a, insiamṭhat theih a beisei.