Spanish football President thar Rafael Louzan

Royal Spanish Football Federation (RFEF) chuan an President thar turin Rafael Louzan an thlang a, Thawhṭannia inthlanah hian vote 90 a hmu - a elpui Salvador Gomar chuan vote 43 chiah a hmu thung a, hneh takin Louzan hi thlan tlin a ni ta a ni.

Spanish football-a thuneitu sang ber RFEF hi July thla khan an President ni lai Pedro Rocha chu thuneihna hman sual avangin kum hnih chhung atan an hrem a, September 2023-a RFEF general secretary Andreu Camps a ban chungchangah thiam loh an chantir - hei vang hian RFEF hi President nei loin rei tak an awm.

RFEF hi an buai rei ve hle - RFEF president hlui tho Luis Rubiales chu nikum August khan FIFA chuan football kaihhnawiha inhnamhnawih thei loin a hrem a, hei hi hmeichhe World Cup-a Spain forward Jenni Hermoso a hmuia a fawh vang a ni.

Rubiales hian amah thlak turin Rocha hi a thlang zui a, thla riat hotupa ber dinhmun chelh lailawkin, hetih chhung hian Rubiales-a thawhpui ṭhinte ban a nei nual a, April khan President dinhmun hi a nghetin a luah a, tunah chuan a aiawh tur thlan a ni leh ta.