Pereira-a'n Wolves enkawl châk

Premier League club Wolverhampton Wanderers chuan coach Gary O’Neil an ban hnuah a hmun ruak luah tura Vitor Pereira lakluh tumin theihtawp an chhuah chhunzawm zel a, Portuguese coach pawh hian Wolves hi enkawl a châk hle niin an sawi.

Wolves hian December 15 khan coach O’Neil chu an ban. Kum 41 mi English coach hian August 2023 khan Wolves hi enkawl ṭanin, a season hmasa berah 14-na a nihpui a, Manchester City, Tottenham Hotspur leh Chelsea an hneh a, FA Cup-ah quarterfinal an thleng bawk.

August khan kum li atan contract thar ziak mah se, tun season-ah league match 16 khel tawhin vawi hnih chiah an la chak a, relegate thei dinhmuna an din mek avangin an ban.

O'Neil thlak tura biak mek Pereira hian Saudi Pro League club Al Shabab a enkawl mek a, FC Porto, Olympiakos leh Shanghai SIPG te chu league nomawi lo chawipui tawhin, club langsar zingah Fenerbahce, Corinthians leh Flamengo a lo enkawl tawh bawk.