Bournemouth leh West Ham inhnehtawk

Hun tawp daawn hnaiah West Ham chuan Lucas Paqueta-a penalty hmangin hma an hruai a, mahse, mualneitu AFC Bournemouth chuan hamrik hnuhnung rik hmain substitute Enes Unal hmanga sutin, team pahnihte 1-1 in an inhnehtawk.

Thawhṭanni zan khan Vitality Stadium-ah inkhel en turin mi 11,204 an pungkhawm a, a hmuna entu an tam lo. Bournemouth tan si phurh sutna goal hi Unal-a'n freekick aṭanga mawi zeta a khung a ni thung.

Bournemouth manager Andoni Iraola chuan, "Yard 30-a hla aṭanga freekick a pet lut kha a mak ka ti lo, a chhan chu training laiin hetiang chu a ti fo tawh a, a tan thil thar leh harsa a ni hran lo," tiin a player a fak.

Point khat an hmuh avangin Bournemouth hian Aston Villa khumin Premier League table-ah parukna dinhmun an luah, khelh zat inangah point 24 ve ve nei mah se goal difference an neih ṭhat zawk avangin a chungah an awm.

Julen Lopetegui enkawl West Ham erawh an chefuh rei thei lo, an match hmasa zawkah Wolves an hneh avangin manager dinhmun derthawng tak a zia deuh a, mahse an harh rei thei ta chuang lo.

Justin Kluivert, Semenyo, Ryan Christie leh Evanilson te goal khung tur chu Hammers goalkeeper Lukasz Fabianski chuan a lo dansak vek a, Arsenal goalkeeper hlui hian point an hlawhchhuah theih nan a thawh hlawk hle.

Spanish manager Lopetegui chuan, "Team ṭha tak Bournemouth lakah hnehna kan chang teuh hle, hun tawp dawnah vanduai vangin goal kan chhuah a ni mai a, kan khelh danah erawh lawmna tur tam tak a awm.

"Match ṭhenkhatah chuan point hmuh phu miah loa kan khelh chang a awm, tun ṭumah erawh kha chuan hnehna chan phu kawpin kan khel chhuak, kan tan chuan point thum ni rih lo mah se chanchin ṭha a ni," tiin a sawi.