Barcelona-ah Enrique a cham dawn
Tunhnaia chanchin ngah tak Barcelona coach Luis Enrique chuan a hmalam hun tichiangin Nou Camp-ah kum 2017 thleng cham turin contract thar a ziak.
Kum 45-a upa manager hian a season khatnaah Catalan club hi a hlawhtlinpui nghal hle a, Champions League, La Liga, leh Copa del Rey te chawipuiin treble champion a nihpui. Kum ruk liamtaa Pep Guardiola hnathawh ropui chu Enrique hian a rawn chhunzawm ve leh chiah a ni.
Player a nih laia Barca tan pawha lo khel tawh Enrique-a'n contract thar a ziah thu hi Barcelona president Josep Maria Bartomeu chuan Thawhlehni khan a puang a ni.
Enrique contract thar ziah thu puan pahin Bartomeu chuan kum 2016 thleng player transfer khawih theih loh tura hrem ni mah se player hrawl tak an club-ah lakluh an tum thu a sawi.
Bartomeu chuan, "Khawvela player ṭha ber ber kan hnena hruai lut turin kan bei mek a, kan player biak mek te hi khawvel club zawng zawngin an club a khel tura an duh te vek an ni," tiin player ṭha lakluh belh zel an tum thu a sawi.
FIFA chuan Barcelona hi kum 18 hnuailam player an lakluh dan dik loh avangin kum 2015 chhung player lakluh an khap a, player an lalut a nih pawn an player lak thar te hi kum 2016 aṭang chauhin Barcelona tan an inlan thei ang.