FA hremna mak titu Jack Wilshere

Arsenal midfielder Jack Wilshere chuan England a football thuneitu sang FA thil tih dan leh amah an hrem chu mak a tih thu a sawi.

Arsenal-in a vawi 12 nan tun season-ah FA Cup an chawi a, an champion lawmna kawng zawhah Wilshere hian an ṭhenawm leh hmelma hlun Tottenham diriamna hla chu au rinna hmangin a sa a ni. Nikum pawh khan hetiang hian a lo ti tawh bawk. He vang hian FA chuan Wilshere hi pawisa chawi turin an hrem.

FA thutlukna mak a tih thu sawiin kum 23-a upa Wilshere chuan, "Kum tluanin rim takin kan inkhel a, kan taksa pawh a chau ṭhin hle. A tawpah hlawhtlinna changin hlim takin kan lawm a ni mai a, hei baka hlimawm hi khawvelah a awm thei chuang lo ang. Hlawhtlinna i chan avanga malsawmna i dawn belh a nih chuan i lawm ngei tur a ni dawn lawm ni? Kei chuan ka thil tih leh kan awm dan kha a pangngaiah ka ngai," tiin a sawi.

Sawi chhunzawmin Wilshere chuan, "Ka chhungte zingah pawh Tottenhman fan an awm a, anni pawhin thil pangngai maiah an ngai. Ka hlim em avangin ka lo uchuak deuh palh a nih chuan ngaihdam ka dil a, mahse ka che sualin ka hre hran lo," tiin a thil tih chu huat tur nia a hriat loh thu a sawi tel bawk.

Wilshere hi England squad-ah awm mekin Pathianni khian Euro 2016 qualifier-ah Slovenia an hmachhawn ang.