2018 World Cup Qualifier Zanin dar 7:00-ah India Vs Oman
Stephen Constantine kaihhruaina hnuaiah India national football team-in Nepal hnehin World Cup qualification first round an patlang a, zanin aṭangin second round khelh ṭan a ni ang - he India team-ah hian Mizo tlangval Jeje Lalpekhlua leh Lalchhuanmawia-te an tel.
Sree Kanteerava Stadium, Bengaluru-ah zanin dar 7:00 hian India leh Oman an inkhel dawn a, Sony Six-ah pekchhuah a ni ang.
Qualifier Kalphung
Second Round-ah hian ram 40 te chu group pariatah ram panga ṭheuha ṭhendarh an ni a. Team tin hi anmahni khelmual leh khualmualah an inkhel chhuak vek ang.
Group tin aṭanga a sang ber pariat bakah pahnihna zinga result nei ṭha pali ten third round an lut ang. Tuna inelna hi World Cup qualifying a nih bakah Asian Cup khel tur zawnna a ni bawk.
FIFA ranking-a 141-naa awm India hi Group D-ah Iran (41), Oman (101), Turkmenistan (173) leh Guam (174) nen an awm ho a, hmabak hi a huphurhawm hle.
Nepal an hneh
India-in English coach Constantine hnuaiah Nepal chu Guwahati-ah Sunil Chhetri goal hnih hmangin 2-0 in an hneh a, Kathmandu-ah goal awm loin indraw zui mah se India hian second round an lut tho.
Hemi ṭum hian Lalrindika Ralte chu player pawimawh a ni a, tun ṭumah hian East Bengal midfielder Didika hi inhliam vangin India squad-ah telh a ni lo. He inkhela Lengpui player Chhuantea a tel ve phak loh avangin Vanglaini chuan India coach Constantine hi zawhna a lo zawt tawh nghe nghe a; India coach hian uluk taka I League a thlir hnuah Jeje bakah Chhuantea chu a ko ta a ni.
Captain thar
India coach Constantine-a'n captain thar a ruat a, keeper Subrata Paul aiah defender Arnab Mondal a thlang a, vice captain chu Sunil Chhetri tho a ni.
Captain a thlak chhan hi keeper Subrata Paul-a'n starting eleven a chang phak loh vang a ni thei. India team-ah Norwegian club Stabaek-a khel Gurpreet Singh Sandhu a awm a, amaherawhchu Subrata hi tawnhriat ngah zawk chu a ni.
Team Khaikhinna
February 2012 khan Muscat-ah India leh Oman-in friendly match an khel a, team ṭha zawk Oman 5-1 in an chak.
Oman hi India aiin ranking-ah 40 laiin an sang a, an keeper Ali Al-Habsi-a'n ram tan vawi 108 a khel tawh a, Premier League-ah Wigan Athletic tan hming a lo chher viau tawh bawk. A tawi zawngin Oman hian India aiin player an nei ṭha zawk.
India probables squad 26 zinga 12 hi ram tana la inlan lo an ni a, vawi nga khel tling lo player 20 an awm. Coach-in India team thar din a tum tih a chiang.
Mizo dinhmun
Nepal an khelh ṭumin Jeje a inhliam a, English coach hian Jeje a la hre chiang lo. Tun ṭuma India training camp-ah hian Constantine chuan, "I League-a i khel chu hmu lo ilang chuan ka thlang lo tawp ang che," tiin Jeje a hrilh.
Jeje hi India squad-ah tawnhriat nei ṭha ber zingah a tel pha a, ani aia goal khung tam chu Sunil Chhetri chiah a awm. Jeje hian ram tana vawi 21 a khelhah goal riat khung mah se tlar hmaah Bengaluru lama inkawp Sunil leh Robin Singh an awm avangin starting eleven-ah a tel dawn leh dawn loh a chiang lo.
Defender Lalchhuanmawia hi left wing back a ni a, Bengaluru rinrawl a ni. Amaherawhchu India squad-ah Manipur wing back tawnhriat ngah zawk Dhanachandra Singh a awm avangin Chhuantea hi a khel dawn nge dawn lo a chiang lo.
Coach thukhawchang
English coach Constantine chuan, "Oman hi hun rei tak chhung an ṭha tawh. Kan team hian kan theihna kan lantir loh chuan Asian Cup kan khel thei lo ang. Ka player-te hian pressure nasa tak an hmachhawn dawn a, an dawl zawh a pawimawh a ni," tiin World Cup aia Asian Cup a ngaih pawimawh thu a sawi.
Team thar an din thu sawi zuiin Constantine chuan, "Player thar ṭhahnem tak an awm avangin inhrethiam turin hun kan mamawh. Hun rei lo te chhung inpuahchahna kan neih aṭangin team ṭha tak kan din a ngai a ni. Chhuanlam siam a theih loh," tiin result ṭha neih ngei an tum thu a sawi.