Sterling beisei sangtu Gerrard

Liverpool captain hlui Steven Gerrard chuan tunhnaia Anfield chhuah­san duh vanga thawm nei lian tak Raheem Sterling chu Liverpool-a cham zel turin thurawn a pe.

Kum 20-a upa Ster­ling hian Liverpool-in kar khata £100,000 hlawh tura contract thar an zawrh chu a lo hnar tawh a, Reds-a kum hnih dang contract ala neih mek pawh hman zawh loh a duh.

Liverpool player ropui Gerrard chuan, "Sterling-a tan chuan Liverpool hi a in zir belh zelna tura hmun ṭha ber a ni. Amahah hian theihna sang tak a awm a, Liverpool player pawimawh ber ni turin theihna a nei a ni. Luis Suarez leh Fernando Torres te anga fan-te atchilh rawn ni turin a thiam tawk a ni," tiin Sterling chu Liverpool player ropui ala nih theih thu a sawi.

Season thara USA lama inkhel tawh tur Gerrard chuan, "Dik taka sawi chuan Sterling hi club danga kal a an squad tikimtu leh player satliah mai va ni tur chuan ka ui a ni. A theihna leh thiamna enin Raheem hian kar tin inkhelh a phu a ni," a ti.

Captain Fantastic tia a hminglem an vuahsak Gerrard chuan season tharah tun aia Liverpool chu an ṭhat zawk a beisei thu a sawi bawk a, kum 35-a upa English midfielder hlui chuan, "Liverpool-in harsatna kan tawh mek hi mi te'n an sawi anga lian em em a ni lo. Anfield-ah hian player ṭha tak tak an tam a, coaching staff te nen an thawhho na a ṭhat phawt chuan season tharah team hlauhawm tak an ni thei ang," a ti.

Liverpool hian player thar pahnih season thar inpuahchah nan an lalut der tawh a, Manchester City midfielder James Milner leh Burnley stri­ker Danny Ings te an lalut. Hetihlai hian coaching staff lamah Brendan Rodgers-a assistant pahnih Mike Marsh leh Colin Pascoe te'n an chhuahsan a, anni pahnih thlak tur hian Liverpool defender hlui Sami Hyypia leh Manchester United first-team coach hlui Rene Meulensteen te hming lam rik a ni.