Chelsea-ah khan ka che chhe hran lo - Schurrle

Wolfsburg forward Andre Schurrle chuan Chelsea-ah khan a che chhe vak bik hran loa a hriat thu a sawi.

Kum 2013 khan Bayer Leverkusen aṭangin pound maktaduai 18-in English champion Chelsea a zawm a, season hnih hun a hman chhungin match 44 khelin goal 11 a khung. Tun season-ah Chelsea-in Premier League nomawi an chawi theih nan pawh tha a thawh ve. Midfield-ah Eden Hazard leh Cesc Fabregas te an awm avangin khelhna hmun a chan tam theihna tur an ram club Wolfsburg-ah February 2015 khan a kal.

Chelsea-a a hun hman chungchang sawiin Schurrle chuan, "Chelsea-ah khan hlawhchham der chu ka ni bik lo in ka hria. Goal ka khung bakah ka ṭhiante tan hna pawimawh tak tak ka thawk ve tawk chuan ka hria. Amaherawhchu player tin ten kan duh chu inkhelh tam leh first eleven chan a ni. Jose Mourinho khan chhuak lo turin min duh mah se ka tana ṭha tur zawka ka ngaih avangin ka chhuak ta a ni," tiin a sawi.

Germany international winger kum 24-a upa Schurrle hian an ram tan pawh match 44 khel tawhin goal khat a khung ve tawh bawk. Kum 2014 FIFA World Cup-a Germany champion na goal Mario Gotze khung kha a siam sak a ni nghe nghe.