Hmeichhe World Cup Record thar nen Brazil tan Marta

Nimin khan football vanga khawvel hriat hlawh Brazil-in hmeichhe lamah pawh an duai loh zia an tilang a, 2-0 in South Korea an hneh.

Brazil tan vawi nga lai Fifa World Player of the Year-a thlan lo ni tawh Marta leh Formiga te'n goal an khung a, Marta hian minute 53 naah penalty aṭanga pet goal-in hmeichhe World Cup-ah ani aia goal khung hnem an la awm lo.

Kum 29-a upa striker Marta hian World Cup-a a goal 15 na khungin Germany striker Birgit Prinz a lehpel a ni. Goal khungtu dang Formiga hi kum 37-a upa ni tawhin hmeichhe World Cup-ah ani aia upa goal khung thei an la awm lo.

England leh Spain an chak zo lo

Thawhlehni zan hmeichhe World Cup inkhelah England leh Spain te'n an khingpui an hneh zo lo.

England hmeichhe team-in kum 1974 hnua an la hneh leh loh France chu an World Cup match hmasa berah an hmachhawn a, 0-1 in an tlawm. France tan minute 29 naah Eugenie Le Somme chuan yard 20 vela hla aṭangin a pet goal a, goal lut awmchhun nizuiin France team-in chak nan an hmang ta a ni.

An inkhelh leh tura Mexico hmachhawn tur England hian France tlarhnung an chhaih buai thei meuh lo a, inkhelh chhung zawngin France goal lamah vawi khat chiah an pet ve a ni.

Inkhel dangah a vawi khat nana hmeichhe World Cup khel Spain-in an World Cup match hmasa berah chak hmel an hmu zo lo a, an khingpui Costa Rica chu 1-1 in an inṭhen pui. Spain tan Losada Gomez chuan minute 13 na lekah goal khung mah se minute khat hnu lekah Raquel Rodriguez chuan Costa Rica tan a sut ve lehnghal a ni.

Colombia an vannei a, an khingpui Mexico lakah si phur reng mah se a tawpah 1-1 in an inhnehtawkpui.

Mexican hmeichhe team tan Veronica Perez chuan mawi takin minute 35 naah goal a khung a, hun rei tak chhung hmahruai zawkah an ṭang. Mahse, Colombia an vannei a, Daniela Montoya chuan minute 82 naah an siphurh hi sutin chak zawk awm lovin inkhel an ṭin a ni.