Pirlo chungchangah Sydney FC an ngawi

Juventus midfielder Andrea Pirlo lakluh tum anga an sawi Australia club Sydney FC chuan Italian midfielder an lakluh dawn leh dawn loh chungchangah engmah an sawi duh rih lo.

Kum 36-a upa midfielder hian a khelh mekna Juventus-ah kum khat dang cham turin contract ala nei a, season tharah chhuak tur anga sawi thuthang a tam hle.

Italian midfielder hi A League club bakah Milan tana a lo khelhpui ṭhin Kaka khelh mekna MLS club Orlando City nen sawizawm an ni bawk.

Sydney FC hi Pirlo agent nen an inbe mek nia sawi a ni a, mahse Australia club hian, "Thuthang leng vel mai mai chungchangah thuchhuah kan siam ngai lo," tiin Pirlo be mek anga an sawi chungchangah engmah an sawi duh lo a ni.