Police hnenah Burzaco a inpe

US Department of Justice-in FIFA hruaitu thubuai a siamsak zinga mi Alejandro Burzaco chu Thawhlehni khan Italy police hnenah a inpe.

Argentine sports marketing firm Torneos y Competencias president Burzaco hi US Department of Justice-in thubuai an siamsak hnu lawk hian khawvel huap police Interpol leh Argentina court chuan manna tur thu an lo chhuah tawh a, a awmna hi hriat a nih lawk loh hnuah amah ngei police hnenah a inpe ta a ni.

Burzaco bakah hian Argentina court chuan Argentine sports executive pahnih Hugo leh Mariano Jinkis te manna tur thu a chhuah bawk a, anni pahnih erawh an awmna chin hriat a la ni lo.

May 27-a FIFA hruaitu pasarih police-in an man aṭanga a awmna chin hriat loh Burzaco hi Italy hmar lama Bolzano khawpui police station-ah a inpe a, a inpek lai hian a ukil pahnih te'n an ṭawiawm nghe nghe.

US Department of Justice chuan Burzaco hi media rights chungchanga FIFA hruaitu te thamna sum peah an puh a, thamna sumah hian dollar maktaduai 110 lai a seng nia sawi a ni.

Burzaco hi president hna a chelhna Argentine sports marketing firm Torneos y Competencias chuan June 3 khan a thubuai avang hian a hna aṭangin an chawlh tir a, May 27 khan thuchhuah siamin kum 30 chuang rim leh thianghlim taka hna an lo thawh tawhna chu Burzaco chet dan hian a mawi lo zawngin a thantir niin an sawi a ni.