FIFA buaina December-ah Blatter-a thlaktu tur

Kum 17 zet FIFA president hna lo chelh tawh Sepp Blatter chuan December 16-ah a office a chhuahsan dawn. Kum 79-a upa Blatter hi thla hmasa lawk khan Zurich khawpuia FIFA congress chuan a vawi nga nan president atan an thlang tling leh a, mahse ni li a liam hman chauh tihin FIFA president aṭanga a ban tur thu a puang a ni.

Swiss pachal Blatter-a'n president hna a bansan chhan hi tunhnaia eiruk thubuai vanga FIFA mualpho vang niin, a ban thu a puan hnu lawk hian amah thlaktu tur thlan a nih hma chuan office a la luahlum tur thu a sawi a, December 16 hi amah thlaktu tur thlanna huna ruat a nih tak avangin kum tharah chuan FIFA-in president thar a nei tawh dawn tihna a ni.

Blatter-a aiawh tur hi an inrinsiak nasa leh tawh hle a, thla hmasa lawka president atana tling zo ta lo Prince Ali bin al-Hussein chu mipui rin kai ber niin Jordan prince hian FIFA kaihruai turin chance a nei sang hle.

Hming langsar dang zingah Asian Football Confe­deration (AFC) president Sheikh Salman bin Ibrahim al-Khalifa, Olympic Council of Asia hotupa Sheikh Ahmad Al-Fahad Al-Sabah, Dutch Football Association president Michael van Praag, Fifa vice-president hlui South Korean lam mi Chung Mong-joon leh Uefa president nilai Michel Platini te hming sawi rik a ni.

FIFA president thlan hun tur hi July thlaa puan chian chauh tur anga sawi ni mah se Blatter berin December thla hi tih chian a duh nia sawi a ni. FIFA hruaitu zinga mi Domenico Scala chuan December 2015 leh March 2016 inkarah inthlan hi neih a nih tur thu kar hmasa khan a lo sawi tawh bawk.

Hetihlai hian World Cup an thlen danah sum an chelek nia rinhlelh vanga Swiss Court-in an chhuichian mek Russia chu FIFA secretary general Jerome Valck leh hruaitu engemawzat in an tlawh a, 2018 World Cup thleng tura an inpuahchah dan te enfiah a ni.

Russia hi an diklohna hmuhchhuah a nih chuan World Cup an thlen tur hi hlihsak an nih tur thu sawi nimahse Russia lama World Cup local organising committee hotu Alexei Sorokin chuan World Cup an thlen dan chungchangah dik lo engmah a awm loh thu leh FIFA duhdan thlapa engkim an kalpui thu a sawi.