FIFA World Cup-a India ram thlen chin

India rama football thuneitu sang ber All India Football Federation hi June 23, 1937 khan din a ni a, kum 1948-ah FIFA hnuaia an inziah luh ṭan chauh avangin 1930, 1934 leh 1938 FIFA World Cup-ah khan tel thei an la ni lo hrim hrim.

1950 FIFA World Cup-ah India vanneihna a rawn inher chhuak a; Burma, Philippines leh Indonesia te an inhnuhdawh avangin qualifying khelh ngai loin an tling nghal. India-in hun ṭha an bawhpelh a, hun duhawm an hnuchhawn avangin tun thlengin World Cup an la khel lo.

India-in World Cup a khelh loh chhan hi chi hrang hranga sawi a ni a, Mizote hriat ṭhan tak pakhat chu FIFA-in ke lawnga khelh a phalh loh vang a ni. 1948 Olympics-ah India player-te'n ke lawnga an khelh avangin kum hnih hnua ball boot bun thiam loh vanga World Cup an hnawl hi thil ni thei a ni. Amaherawhchu hetihlaia India captain Sailen Manna chuan AIFF-in a chhan dik tak an thup nana chhuanlam an siam chawp a nih thu a sawi thung.

India-in World Cup a khelh loh chhan tak nia lang erawh hetih hunlai hian World Cup (Jules Rimmet Cup) a la lar tawk lo a, Olympic an ngai hlu zawk. India captain Sailen pawhin AIFF-in World Cup a ngaih pawimawh tawk loh vanga tel lo an nih thu sawi.

FIFA Organizing committee-in AIFF hnehah India tel theih thu an hrilh har hret a, inpuahchahna hun a tam loh avang leh sum lama harsatna an tawh avangin India hian World Cup an hnawl niin sawi a ni bawk. Chutihrualin chhan bulpui ber erawh AIFF-in World Cup a ngaih pawimawh tawk loh vang a ni.

1954 World Cup-ah FIFA-in India tel a phal lo a, kum li hnuah hremna hlih ni mah se 1958, 1962, 1966 leh 1970-ah India an inlan lo hrim hrim a. 1974 World Cup-ah qualifier khel turin India an inziak lut zet a, an inhnuhdawh leh avangin an aiah North Korea chu telh an ni. 1978 leh 1982 World Cup-ah India an inlan lo hrim hrim bawk.

1986 World Cup-ah India-in qualifier an hmachhawn ve ta a, first round-ah Indonesia, Thailand leh Bangladesh nen group khatah an awm. India hian match hmasa berah Indonesia an hneh lo a, vawi hnih ṭheuh inkhelh kual hnuah Indonesia an tluk loh avangin an tla.

1990 World Cup-ah India-in qualifying round khel loin an inhnuk­dawk. 1994 World Cup qualifiers-ah India an inlan leh a, Group D-ah South Korea, Bahrain, Lebanon leh Hong Kong nen an awm ho a, group mawngphah an ni.

1998 World Cup Qualifying first round-ah India chu Qatar, Sri Lanka leh Philippines nen Group 10-ah an awm a, Qatar a chung berah awmin India chu pahnih Sri Lanka hnuai chiah an awm. 2002 Word Cup qualifying first round-ah India an khel chhe lo; UAE, Yemen leh Brunei nen group khatah an awm a, point 11 hlawhchhuak mah se point khatin UAE an pha lo.

2006 World Cup qualifiers-ah India chu Japan, Oman leh Singapore te nen group khatah an awm a, Group 3 aṭangin chiang takin Japan tling chho mah se Mizote tan chuan hun chhinchhiahtlak a ni. September 8, 2004 khan India-in Salt Lake Stadium-ah Japan an mikhual a, bench-ah Mizo tlangval Jerry Zirsanga a ṭhu tluan a. October 13, 2004-a Singapore an khelh ṭumin Jerry hi a khel tluan a, November 17, 2004-a Oman laka point an hlawhchhuah ṭumin Jerry hi a inlan bawk.

Khawlailung tlangval hi Mizo zinga World Cup qualifier khel hmasa ber a ni. 2010 World Cup qualifiers-ah India-in first round-ah Lebanon an hmachhawn a, aggregate-ah 6-3 in an hneh lo.

2014 World Cup qualifiers-ah India tan first round khelh a ngai lo a, second round-ah India-in UAE aggregate-ah 5-2 in an hneh lo. India leh UAE inkhelh ṭum hian Jeje Lalpekhlua chuan match pahnihah starting eleven a chang ve ve a, bench aṭangin Lalrindika Ralte a rawn lut ve ve bawk. Second leg hi July 28, 2011 khan Dr Ambedkar Stadium, Jawaharlal Nehru Stadium-ah khelh a ni a, 2-2 in an inhnehtawk. Hnahthial tlangval Jeje-a'n minute 74-naah UAE lamah a khung a, a siamsaktu hi Lunglei tlangval Didika a ni. Mizo zinga World Cup qualifier-a goal khung hmasa ber leh khung awm chhun chu Jeje a ni.