Derby County-ah Bent leh Pearce

Championship club Derby County-in an manager Steve McClaren an ban hnuah player an lak belh zel a, Thawhṭanni khan England tan pawha lo khel tawh striker Darren Bent leh Reading defender Alex Pearce te an lalut.

Kum 31-a upa Darren Bent hian Aston Villa aṭangin season liamtaah khan Derby County hi loan a panin match 17 a inlanah goal 12 a khung a, tunah a nghetin a lut dawn ta a ni. Villa player man to ber ni tura kum 2011-a Aston Villa pantu hian June thla khian Villa Park-a a contract neihlai a hman zawh tawh dawn avangin free transfer-in Derby hi a zawm dawn a ni.

Republic of Ireland international centre-back Alex Pearce hian kum thum cham turin Derby-ah hian contract a ziak a, Reading-a a contract neihlai a hman zawh tawh avangin free transfer thoin Derby County hi a pan dawn a ni.

Kum 26-a upa Pearce chuan, "Kum 12 ka nih aṭangin Reading-ah hian ka awm tawh a, mahse kan hringnunah hian inthlak danglam a ngaih chang a awm fo ṭhin a, vawiin hi chu hun chu niin ka hria. Chona thar hmachhawn ka chak a, chu chona thar chu Derby-ah hian ka hmachhawn thei dawn a ni," a ti.

Derby-in coach thar atan an lak Real Madrid assistant manager hlui Paul Clement chuan player ṭha an lalut thei chu a lawmthu sawiin a bik takin Bent a fak a, Chelsea, PSG leh Real Madrid-a Carlo Ancelotti kaihza vengtu rinawm ni ṭhin chuan, "Bent hian goal a khung theih zia kan hre tawh a, kan ruahmannah ani hian hmun a chang pawimawh dawn hle a ni," a ti.