Newcastle United-in John Carver an ban
Premier League club, season hman zawh taka division hniam lama tla thei dinhmuna ding hman Newcastle United chuan an coach Alan Pardew chhuah hnua an manager lailawk atana an ruat John Carver chu a hna aṭangin an chawlh tir. Carver-a rual hian a assistant Steve Stone chu chhuah tir a ni bawk.
Newcastle manger ṭanglai Alan Pardew-a'n Crystal Palace a pan san hnuah Carver hian Magpies manager hna a chelh a, match 20 a enkawl chhungin vawi thum chiah hnehna a chanpui thei a ni.
Premier League-a a match tawp bera Magpies inhamtan puitu Carver chuan Newcastle United a enkawl thei chu a tan chawimawina ropui tak a nih thu sawiin, "He club ṭantute leh Newcastle khawpuia chengte hian team hlawhtling tak neih an phu a ni. Manager ka nih chhungin ka thawhpuite nen theihtawp chhuahin kan squad neih ang ang ka hmang ṭangkai a ni," tiin thawk chhia a inti hran lo.
English manager Carver chuan, "An hmalam hun atan Newcastle hi ka duhsakna sang ber ka hlan a, thla ruk chhung he club ropui taka ka tawnhriat avang khan chona thar hmachhawn turin ka phur tawh hle a ni," tiin coaching bansan mai a la tum hmel loh hle.
Carver thlak tur hian Steve McClaren hming lamrik a ni a, England boss hlui hi thla hmasa lawk khan championship club Derby County chuan an ban a, season tawp hma khan Magpies hian vawi hnih lai an coach hna chelh turin McClaren hi an lo sawm hlawhchham tawh.
Newcastle United managing director Lee Charnley chuan manager thar an rawih hunah manager chuan ama duhthlanna ngeia coaching staff a din tur thu a sawi.
Charnley chuan, "John nen uluk taka inbiakna kan neih hnuah club tana ṭha tur bera kan hriatin thutlukna kan siam ta a ni. John Carver hian Newcastle hi a hmangaih em em a, amah ang tluka a theihna zawng zawng nena Magpies enkawl thei hi an vang ang," a ti.
Newcastle junior team-ah pawh lo khel tawh ṭhin Carver hian point 48 hlawhchhuah theihnaah Magpies hi point 9 a hlawhchhuahpui a, heti chung hian Premier League manager ṭha ber anih thu a lo sawi tawh a ni.