Cavaliers-in LeBron an nei, an chak!

Kum 1964-a American football club Cleveland Browns-in National Football League (NFL) an champion hnuah Cleveland khawpuiin infiamnaah ram pum huap inelnaah an la champion lo. Cleveland beiseina chu LeBron James-a kaihhruai Cleveland Cavaliers an ni a, Cavs hian NBA final-ah Golden State Warriors lakah 2-1 in hma an hruai mek.

Kumin NBA final game hmasa pahnihah overtime khelh a ngai a, Game 3-ah a ngai tawh lo - hun pangngaiah Cavs 96-91 in an chak.

Quicken Loans Arena-ah LeBron James a che ropui a; 40 points, 12 rebounds leh assists pariat neiin Cavs chakna kawngah a che ṭha ber.

Cavs-in Game 1-a Warriors an hneh loh ṭum khan final khel chhunzawm thei lo turin Kyrie Irving a inhliam a, April thla khan season tluan inlan thei lo turin Kevin Love a inhliam tawh bawk avangin Cavs Big Three hming lem an vuah zingah LeBron chiah a awm tawh.

Warriors hian regular season-ah league record thar siamin vawi 67 zet an chak avangin Cavs tan hna a awlsam lo a, mahse LeBron an nei tlat.

Nilaini zingah Cavaliers-in bul an ṭan ṭha a, third quarter a zawh chuan chuan 72-55 in hma an hruai tawh. Quarter linaah Warriors an che ṭha a, 84-80 te ni chho mah se Cavaliers an ṭang tluan a, 96-91 in hnehna an chang.

Warriors-in MVP Stephen Curry an kawl nachungin, Warriors guard hian Game 2-ah vawi 23 shot-ah vawi 18 zet a lut lo. Game 3-ah Curry record a ziaawm hret a, chakpui tham erawh a ni lo. Curry hian point 27 chauh a score a, a chetṭhatna daltu hi Cavs guard Matthew Dellavedova a ni.

Australian star Dellavedova hian Game 2-ah Curry a veng hneh em em a, Game 3-ah tlar hnung lama a thawh hlawk a, point 20 neiin assists pali a nei bawk.

Zirtawpni zing dar 6:30 khian Quicken Loans Arena, Cleveland-ah Game 4 khelh a ni dawn. Warriors tan dinhmun khirkhan zawk an hmachhawn hmain thawh chhuah vat a hun dawn a, Cavaliers hian an squad chhah tawk lo an tuar thei bawk.

Game 3-ah khan Warriors bench ten points 39 zet an score laiin Cavaliers bench-in point 17 chiah an nei thung. NBA final-a team chhe zawka ngaih Cavaliers an che ṭha zawk khauh hi boruak tisangtu a ni.