Tottenham hmaah Amorim 'Man United' fiahna

Manchester United chuan Eithad Stadium luhchhuahin Manchester City 2-1 in an hneh a, an phur vanglai takin Tottenham Stadium-ah an lenglut dawn. Zanin dar 1:30 hian Ruben Amorim-a hoten Tottenham an hmachhawn dawn a, League Cup quarterfinal a nih avangin inkhel a pawimawh hle.

Portuguese manager Amorim hian City an hneh ṭumin squad-ah Marcus Rashford leh Alejandro Garnacho te a tel lo a, zaninah erawh chhawr theih turin an awm a rinawm. Spurs hmaa Man United inrem dan tur hriatthiam a har hle.

Tlarhnung lam

Amorim-a'n khelh dan phung nghet a nei a, defender pathum a hmang ṭhin. Goalkeeper Andre Onana khawih chet a rem lo a, City lakah Harry Maguire a che ṭha a, Lisandro Martínez leh Matthijs de Ligt te an rintlak sa avangin defender pathum tur pawh a chiang chho. Chutihrualin Leny Yoro a la awm tih hriat a ṭha.

Bayern Munich aṭanga Old Trafford pantu Noussair Mazraoui a che ṭha ṭhin a, City laka an inhliam avangin bul ṭan lo thei dinhmunah a ding. Diogo Dalot-a'n Mazraoui hmunruak hi a luah thei ang a, vei lamah Tyrell Malacia a awm thei thung ang.

City laka Amad Diallo-a'n chakna goal a khung khan, subsitute bench aṭanga lo lawmpuitu chu Casemiro leh Christian Eriksen te an ni a, an hming aṭanga teh ringawt chuan Man United squad a chhah ṭha.

Mason Mount inhliam mah se Amorim-a'n duh thlan tur a la ngah a, Casemiro leh Eriksen bakah Manuel Ugarte leh Kobbie Mainoo te an awm a, player pakhat vel chu a siksawi ve ngei a rinawm.

Tlarhma lam

Tlarhmaah Rasmus Hojlund leh Joshua Zirkzee te a inchhawr chhawk a, Amorim hian a la chhunzawm dawn a nih chuan Zirkzee luh hun a ni thei ang. Chutihrualin khawih chet thiang lo player a awm thar a, a hming chu Amad Diallo a ni.

Amorim-a'n chak a duh a nih chuan Diallo hi bench-a dah a thiang lo. Chutihrualin aia Man United-in hma an sawn dawn a nih chuan captain Bruno Fernandes-a'n hmasawnna tur a ngah. Fernandes hian City laka penalty aṭangin hun tawp dawnah siphurh a sut a, goal dang khung belh lam aiin goal khung a ngai pawmawh zawk! City laka point khat hmuhah a lungawi a tih theih hial.

Portuguese midfielder Fernandes hian hmun pawimawh a chang a, midfield khai pa ni mah se ball pek sual leh ball hloh a ngah avangin a ṭangkai tur angin a ṭangkai ṭhin lo. United captain hi a insiamṭhat a ṭul.

Man United hian goal khung kawngah hma sawn mah se an goal bawh erawh a la tawk lo. Ajax aṭanga manto taka an lakluh Antony leh academy chhuak Rashford leh Garnacho ten an theihna an lantir a hun viau bawk.

Chona thar

City laka squad-a a awm loh hnuah Rashford-a'n chona thar hmachhawn tura a inpeih thu a sawi a, mual chhunga a theihna lantir loin thu hmang bawkin bul a ṭan.

Rashford hian harhtharna tak tak a chang em tih chu khelmualah a hriat ang. Chutihrualin an lantir lo a nih chuan Amorim hnuaiah chuan a en liam mai lo ang, tih a chiang viau thung.

Amorim hian United thar din a tum a, Premier League match nga a enkawl tawhah starting eleven-ah player 19 a thlak tawh a, chu chu match tina 3.8 ang zel thlak ang a ni.

League match zawng zawngah hian Amorim hian substitution panga a hmang vek zel bawk. Portuguese manager hnuaia an result ṭha ber chu an hmelma Manchester City an hneh hi a nih a rinawm a, tuna an hmabak erawh Eik Ten Hag-a hoa an hneh loh Tottenham hneh hi a ni ang.

Manchester United hian December 22, Pathianni zanah Bournemouth an mikhual dawn a, Tottenham Hotspur-in hemi zan vek hian Liverpool an mikhual thung dawn.

Hriatthiam har Spurs

Tottenham-in September 29, Pathianni khan Manchester United an sawp a, Ange Postecoglou hote hi champion tura rinkai chu ni pha lo mah se Champions League khel pha thei tura ngaih an ni. Mahse, London club hian chet ṭhat ṭum leh chet chhiat ṭum an nei a, hei vang hian Premier League-ah pawh 10-naah an awm chauh.

Spurs hian Europa League-ah match hmasa pathum an chak hnuin match hnuhnung pathumah chak an nei lo a, Premier League-ah pawh Manchester khaw club pahnih Man United (3-0) leh Man City (4-0) te sawp mah se match sarih ngawt an chak tawh lo.

Chutihrualin Spurs hi an vanduai ve ṭhin bawk a, an chak lo ṭumah pawh an khel ṭha ṭhin hle. Man United an hmachhawn hmain an insiamṭha hman a, Pathianni zan khan Southampton 5-0 in an sawp. Saints lakah hian first half-ah goal nga an khung tawh a, halftime-ah captain Son Heung-min an la chhuak a, hahdamna hun ṭha an peah a ngaih theih.

Tottenham hian quarterfinal thleng turin Coventry (2-1) leh Manchester City (2-1) te an hneh a, inelna a sang tawh avangin Postecoglou-a'n player ṭha a luhtir a rinawm bawk. Tun season-ah Spurs tan James Maddison a che ṭha a, midfielder nichung siin Premier League-ah ringawt goal sarih a khung tawh.

Maddison hi midfield-ah a ṭangkai a, Pape Matar Sarr leh Yves Bissouma ten an thlawp ṭha bawk. Tlarhma lamah inlena hrang hranga goal ruk khung tawh Son a pawimawh a, chutihrualin goal khung tam ber erawh Brennan Johnson niin goal 10 a khung.

Chutihrualin hliamin Spurs hi a tibuai ve hle. Goalkeeper Guglielmo Vicario bakah defender pawimawh Cristian Romero, Micky van de Ven, Destiny Udogie leh Ben Davies te an inhliam vek. Midfielder Rodrigo Bentancur hrem a la ni a, forward Richarlison a la inhliam.

Man United khingpui tur hi Spurs ṭha ber an ni lo a, chutihrualin London club hian position tinah a thlakna tur an nei ve zel. Kum 36 mi Fraser Forster an kawl avangin goalkeeper Vicario inhliam an tuar hran lo a, defence lai pawh Radu Dragusin leh Archie Gray ten hna an thawk ṭha viau.

Hei bakah hian Spurs hi an muala khel tur an ni a, Tottenham Stadium hi quarterfinal thleng tura Manchester City an hnehna hmun a ni.

Postecoglou-a'n club a enkawl tawhna reng rengah season hnihnaah chuan nomawi a chawi ziah a, Premier League nomawi beisei ngam chi a nih tawh loh avangin League Cup hi an lak thutak a ṭul hle.