Denic-a hmaah Kazakh val a zak!

Sakeibaknei tawm buk luhkhungtu tan mei khupa chhuah leh mai loh chu tih theih a awm lo - Asian champion Denic Lalruattluanga chuan arm wrestling-ah chuan mi danglam bik a ni tih pholangin, Thawhlehni zan khan Pro Panja Mizoram Mega Match-ah Assanali Nurmagambet chu 3-0 in an hneh.

India rama arm wrestling inelna lar Pro Panja League leh Sports & Youth Services, Mizoram ṭangkawpin an buatsaih inelnaah hian Denic-a bakah C. Lalnunpuia, Raymond K. Lalrinpuia, Vanlallura leh B. Lalremruatkima te an inlan bawk a, an vai erawhin an chak lo.

Denic-a bakah hian Vanlallura leh Kimkima ten an khingpui ve ve an hneh a, Nunpuia leh Raymond te an chak zo lo thung - inkhel panga belhkhawmah 3-2 in Mizoram an chak a, Pro Panja Mega Match a hlawhtling hle.

A tirah

Match hmasa berah Vanlallura a inlan a, Pro Panja League thlenga hming lo chher tawh arm wrestler hian Assam lam ban elh chak Nilay Sankar chu harsatna nei loin a hneh a, Tlangnuam Vengthar tlangval che vel hi mit titlai a tling.

Lammuala mipui boruak sosang tak karah, kum 15 mi Kimkima a lo pen chhuak ve leh a, Champhai rawlthar hian India mai ni lo, Asia thlenga hming lo chher tawh, Assam mi Ishan Kashyap a hneh - thawm chu ring tak a ni.

Mahse, Mizo tan hnehna hlado chham reng theih a ni bik lo - Mizoram champion Lalnunpuia chuan world no. 5 leh Kazakh national champion vawi tam lo ni tawh Bekzhan Ramiyanov a hneh lo a, 2-1 in Mizoramin hma an la hruai tho.

A 'hot' chho

Co-main event-ah Mizo tlangval tho Raymond leh Tridip Medhi an inhmachhawn ve leh a, vawi sarih national champion ni tawh leh Asian champion dinhmun hial chelh thei Medhi lakah Raymond a ṭang zo lo a, 2-2 a ni chiah.

Raymond-a te result hian boruak a ti 'hot' leh zual sauh a, Denic-a a tlawm chuan Mizoram an tlawm dawn tihna a ni. Mahse, Mizo tlangval hian Kazakh ban elh chak, eizawn nana arm wrestling hmangtu Assanali Nurmagambet chu 3-0 in a hneh.

Lammuala arm wrestling ena pungkhawm mipui 15,000 chuang thawm a ring a, "Mizo mipui hmaa chak loh hi ka hlauh ber a ni," titu Denic-a'n Mizo mipui hmaah ngei mikhual tlangval a hneh a, a tan zan chhinchhiahtlak a ni reng tawh ang.

Kan lawm e

Denic-a'n Asian champion dinhmun a luah aṭangin, arm wrestling-in Mizo mipui zingah ngaihven a hlawh thar a, Thawhlehni zana ban inelh hmuhnawm pawh a hmunah entu an ṭhahnem takzet.

He inelna buatsaihtu, Pro Panja League neitu ni bawk Parvin Dabas chuan, "Beisei phak baka tam an lo kalkhawm a, a ropui takzet a ni - Kum 2025-ah North-East ArmWrestling Championship buatsaih a ni dawn," a ti a, hmarchhaka talent awmte haichhuah an tum thu a sawi.

Mizoram sports minister Lalnghinglova Hmar chuan, "Zanina kan thil huaihawt hlawhtlinna hian min tiphur hle a, nakin zelah pawh hetiang ang inelna ṭha buatsaih zel tur hian min tiphur hle a ni. Hetiang ang inelna kan buatsaih hian sports tourism lamah nasa takin min pui a, Mizoramin infiamna hrang hranga hma kan sawnzia pholanna remchang a ni bawk," a ti a, Pro Panja Mega Match hlawhtlinnaah a lawm.