Vinicius Jr kutah FIFA Men’s Player Award

Football thuneitu sang ber FIFA chuan Best FIFA Football Award 2024 an sem chhuak a, mimal chawimawina langsar leh ngaihhlut hlawh ber Best FIFA Men’s Player chu Vinícius Junior kutah hlan a ni.

Season hmasa khan Vinicius Jr hian Real Madrid hlawhtlin theih nan a thawh hlawk hle, inelna hrang hrangah goal 24 a khung bakah assist vawi 11 neiin Spanish club lian hi La Liga leh Champions League nomawi a chawipui.

Barcelona midfielder Aitana Bonmati chu Best FIFA Women’s Player atan thlan a ni bawk a, tun hnai kum hnih chhung chu Bonmati hian a zawnin a dawng a, tunlai hmeichhe player zingah amah tluk zo tu an awm lo.

Football huanga mimal chawimawina ngaihhlut bera ngaih Ballon d'Or sem a nih dawn khan, Real Madrid chuan Vini-a'n a dawng dawn lo tih hre thawiin award semna hmunah Spanish club player tumah an kal lo - Rodri kutah hlan a ni zui ta bawk.

Tun ṭuma Best FIFA Football Awards 2024 erawh Aspire Academy in Doha, Qatar-ah sem niin, a hmunah Vinicius Junior hi a kal. Brazil international hian vote thlak aṭanga point 48 hmuin a chungnung ber, amah hnaih bertu Rodri chuan point 43 a hmu thung.

A vawi khat nana Best FIFA Men’s Player Award dawngtu Vini chuan, "Tun hma chuan Sao Goncalo kawtthlerah kelawngin ball kan pet ṭhin a ni a, tunah chuan hetiang dinhmun hi ka thleng ta, thil tak ngei ni mah se awih pawh a harsa.

"Tuna ka hlawhtlinna hi khawsak harsa zawkte tan entawn tlak ni ve se ka duh, engmah nei lo leh harsa tak chung pawhin hlawhtlinna hi chan theih a ni tih hria se ka duh," tiin a sawi.

Award hi kum 2023 August aṭanga kum 2024 August inkara an chet dan aṭanga teh a ni a, mipui vote bakah FIFA hnuaia ram hrang hranga chanchinbu mi pakhat zel bakah, ram tin captain leh coach ten an vote hmangin an thlang.

FIFA Football Award hi kum 2016 aṭanga sem ṭan kha a ni a, a hmasa pahnih chu Cristiano Ronaldo kutah hlan niin - Real Madrid player zingah Ronaldo, Luka Modric leh Vinícius Junior te chu a dawng thei pathum an ni.

Mimal chawimawina sang dawng tura chhawp chhuah zingah hian Lionel Messi a la tel a, Argentina captain hi parukna a ni. Messi hian Copa America nomawi a chawi a, club lamah Inter Miami chu a chet ṭhatpui bawk, mahse vanglai pel tawh leh club huanga inelna sang hmachhawn tawh lo a nih avangin a buk a rit thei tawh lo.