Coach of the Year Carlo Ancelotti

Real Madrid hlawhtlinpuitu Carlo Ancelotti chu Best FIFA Men’s Coach Award hlan a ni, season hmasa khan Spanish club hi La Liga leh Champions League nomawi a chawipui a ni.

Italian manager Ancelotti chuan, "Football hian thawnthu tam tak min hrilh tawh a, hun hlimawm leh lungngaih nite min hmuh tir a, rilru no leh lungchhe taka min awmtir chang pawh a tam.

"Kum 48 chhung tehmeuh mai chu football ka chenchilh ta, tun thlenga ka la awm reng nachhan chu nuam leh hlimawm tak tak min thlentir ṭhin vang a ni," a ti a, a hlawhtlinna chan tawh ho chu a la duh tawk mai lo, nomawi dang a la duh belh.

Carlo Ancelotti hi kum 65 mi a ni tawh a, khawvela coach hlawhtling berta zinga mi a ni. Manager a nih hnuah AC Milan chu Champions League title vawi hnih a lakpui tawh, Milan bakah hian Real Madrid chu vawi thum a champion pui tawh bawk.

Ancelotti hian point 26 hmuin a chungnung ber a, amah hnaih bertu chu Xabi Alonso niin point 22 a hmu thung. Spanish manager Alonso hian Bayer Leverkusen chu hlawhtlin pui viau mah se, mimal chawimawina dawn nan a tawk zo lo.

Real Madrid manager Ancelotti chuan, "He chawimawina hi keimah chauh ni loin, club president, player leh ka thawhpui zawng zawngte vanga dawng thei ka ni a, kan zavaia tan a ni e," tiin a sawi.

Premier League manager zingah Claudio Ranieri, Jurgen Klopp (vawi hnih), Thomas Tuchel leh Pep Guardiola te chuan tun hmain Best FIFA Men’s Coach Award hi an lo dawng tawh a ni.