Zaninah Champions League khel tur zawnna

Zaninah Premier League match thum khelh tur a awm a, Champions League khelh tuma inchuh Leicester City, Manchester United leh Tottenham Hotspur te an inlan dawn.

Zan dar 1:00-ah Foxes leh Spurs-in West Ham United leh Norwich City an mikhual dawn a, Manchester United-in zan dar 1:45-ah Burnley an hmachhawn bawk ang.

Champions League-ah English club tan hmunruak pali a awm a, Liverpool leh Manchester City ten an khelh ngei a rinawm avangin hmunruak pahnih la awlah a ngaih theih. Club sulhnu nei ṭha aṭanga thlir chuan Foxes, Chelsea, Man United, Spurs leh Arsenal ten an inchuh dawn niin a lang.

Point dinhmun aṭanga thlir erawh chuan Gunners hmabak a hautak dawn. Mikael Arteta hote hian point thum hmuh an harsat reng chuan season thara Europe-a inelnaa tel lo thei dinhmunah an ding. Nizan khan Chelsea nen an inhmachhawn a, result kan hre hman lo.

Leicester City-in Krismas hmaa match riat a zawna an chak hnuah match hnuhnung pasarih aṭangin point sarih chauh an hmu. Tun hma pawhin hetiang hi a thleng fo, Foxes hi an tla hniam ta duai tihna lam ni loin an khingpuiten chelh dan tur an hriat tak vang a ni thei bawk.

Foxes tan Jamie Vardy a rawn chet ṭhat leh a ṭul a, English striker hian December thla khan a nupui Rebekah nen fa an neih hnuah goal a khung leh tawh lo. Vardy hian an match hnuhnung bera Burnley an hneh loh ṭumin penalty a hlah a, an mangchhia aṭanga ṭhangharh turin tun season Premier League-a goal 17 khung tawh striker hi a pawimawh ang.

Brendan Rodgers hote hian December thla khan West Ham hi 2-1 in an hneh a, Manuel Pellegrini-a'n a hna a chan phah bawk. David Moyes hnuaiah Hammers-in Bournemouth 4-0 in an sawp nghal a, FA Cup-ah Gillingham 2-0 in

hneh zui mah se Sheffield United (1-0) an hneh loh avang leh an match hnuhnung bera Everton nen 1-1 a inhnehtawk avangin fak chiam tur an la ni lo.

Tottenham-in match hnuhnung paliah chak hmel an hmu tawh lo a, match thumah goal an khung lo. Jose Mourinho-a'n Harry Kane tel loin an nih tur ang an nih loh thu a sawi a, Portuguese manager thusawi dikna lang mah se Champions League khelh an duh a nih chuan goal khung tur an mamawh.

Season liam ta khan Kane awm loh laiin Lucas Moura leh Son-Heung Min ten English striker hmunruak an luah zo a, Mourinho pawhin table mawngphaha awm team laka point thum a hmuh theih loh chuan dem a hlawh ṭan ang. Spurs hian zanina an mikhual tur Norwich City nen hian December thla khan 2-2 in an inhnehtawk. 

Manchester United-in an hmelma Liverpool an hneh lo a, an striker ṭha Marcus Rashford chu a rei lo berah kar ruk chhung an chhawr thei dawn lo. Ole Gunnar Solskjaer tana chanchin ṭha awm chu transfer hun a la tawp lo a, insiam ṭhatna hun a awm.

United hian Old Trafford-ah Burnley an mikhual dawn a, chak an mamawh bakah point thum hmu tura beiseiawm zawk an ni. Nimin tlai khan Solskjaer chuan, "Marcus hi inhliam lo se kan duh a, chutihrualin a êng zawnga thlir ṭhin a nih avangin ngaihtuah tur a awm lo. Rawn let thuai a duh a, damdawi thiamten a inpeih tia an nemngheh hunah kan rawn kir ang. Mason Greenwood-a'n khelhna hun tam zawk a neih theih phah dawn a, Juan Mata-a'n mawhphurhna a lak theih a ṭul dawn," tiin a sawi.

Kum 18 mi Greenwood hian league-ah goal li a khung tawh a, tun season-ah goal kua a khung der tawh. Kum 31 mi Juan Mata-a'n league-ah goal la khung lo mah se Norwich City an sawp ṭum leh Wolves (FA Cup) an hneh ṭumin team chakpui thei a ni tih a pholang.

Liverpool nena an inkhelh ṭumah pawh Mata hi game lan dan thlaktu a ni a, Andreas Pereira leh Fred te neih loh 'killer pass' a neih avangin hmun lailum a chan a rinawm. December thlaa United-in Burnley 2-0 a an hneh khan Anthony Martial leh Marcus Rashford ten goal an khung a, English forward awm tak loh avangin French forward mawhphurhna a sang ang.