Spin legend Ashwin-a'n inkhelh a chawlhsan

Indian cricket team spinner Ravichandran Ashwin chuan Australia nen Brisbane-a third Test an khelh zawhah international cricket khelh a chawlhsan thu a puang.

Kum 38 mi Ashwin hi Australia nen Adelaide-a second Test an khelh ṭumin a inlan a, third Test-ah erawh Ravindra Jadeja-a'n a rawn thlak. Tamil Nadu cricket Ashwin hian sulhnu ṭha tak a hnut chhiah a, India tan Test cricket match 106 a khelh aṭangin wicket 537 a la a, Anil Kumble (619 wickets) chiah a tluk lo.

Aswhin chuan, "Hun rei ka hmang dawn lo. Vawiin hi India cricketer anga ka inlan hnuhnun ber a ni tawh dawn," tiin a chawlh thu a puang a, captain Rohit Sharma chuan, "A thutluknaah a chiang a, a thutluknaah a ding bawk ang," tiin a sawi.

ODI lamah pawh Ashwin hian match 116 khelin wicket 156 a la a, a khelh ṭhat ber ṭumah wicket pali lain 25 runs chiah a pe. T20-ah match 65 khelin wicket 72 a la a, a khelh ṭhat ber ṭumah wicket pali laiin 8 runs chauh a pe a ni.

Inelna pathum Test, ODI leh T20-ah Ashwin hian India tan match 287 khelin 765 wickets a la a, India tana wicket lak tam kawngah Kumble (953) chauh a pha lo. Ashwin hi Indian Premier League-ah a la inlan chhunzawm dawn a, IPL 2025-ah Chennai Super Kings tan a khel ang.