Leverkusen-in Wirtz an chhuah phal lo - Bayern CEO

Bayern Munich CEO Jan-Christian Dreesen chuan German star Florian Wirtz chu lakluh duh mah se Bayer Leverkusen-in chhuah an phal loh thu a sawi.

Dreesen chuan, "Bayer Leverkusen hian chhuah an phal lo," tiin Wirtz a chungchang a sawi a, sum hmanga lei chhuah theihah a ngai lo.

Leverkusen hian Wirtz hi contract thar ziahpui tumin hma an la mek a, World Cup 2026 thlenga cham turin inremna an neihpui hnai anga ngaih a ni.

Kum 21 mi Wirtz hian Germany tan match 29 khelin goal ruk a khung tawh a, a inzirchhuahna Bayer Leverkusen tan pawh season ruk khelin hming a chher tawh hle.

Wirtz hian Leverkusen hi an la chawi ngai loh Bundesliga nomawi a chawipui tawh a, hei bakah hian DFB Pokal leh DFL Super Cup a lakpui tawh bawk. Tun season-ah Wirtz hian inelna hrang hrang match 24 aṭangin goal 11 a khung a, a record ṭhat ang thoin khelmualah pawh a hmuhnawm a ni.