Aizawl FC an chesual nawn; I League-ah Mizo player-te an che ṭha

Mizo hlanga khel Aizawl FC-in kum 2024 chak chunga khar theihna hun ṭha an neih chu an bawhpelh. Mizo club hian Real Kashmir lakah goal khatin hma hruai mah se hun tawp dawna goal an chhuah avangin 1-1 in an inhnehtawk.

Victor Lalbiakmawia hote hian Real Kashmir hma hian Rajasthan United lakah 1-0 a hma an hruai chungin hun tawp dawnah an inlehthal tir a, point ruk hmuh theihna turah point khat chauh an hlawh chhuak. Aizawl FC-in kuminah match an nei tawh lo a, January 9, Ninganiah Sreenidi Deccan an mikhual ang.

Mizo an ṭhahnem

Aizawl FC-in goalkeeper Vanlalhriatpuia hliam vangin tun season-ah an chhawr theih a rinawm tawh lo a, captain Lalchhawnkima leh MPL11 best player Lalthankhuma (TK-a) te hrem vangin an inlan thei lo bawk.

Mizo club hi kim lo mah se RG Stadium-ah game ṭha tak an khel tho. Victor Lalbiakmawia'n KimKima aiah Lalruatthara luhtirin captain armband a hrentir a, TK-a aiah Lalrinzuala lutin 4-1-4-1 hmang loin 4-4-2 a hmang thung.

Real Kashmir lamah Mizo pahnih Lalramsanga leh Lalramdinsanga Ralte ten bul an ṭan ve bawk a, khelmuala player 22 zinga 13 zet chu Mizo niin an khel ṭha tlang bawk. Mikhual team lamah Ramsanga chu ball semtu a ni a, Champhai Kanan midfielder hi midfield aṭangin defence laiah tawlh letin a hnung aṭangin ball a sem.

Ramchhana che ṭha

Mual sir lamah Ramdina a hmuhnawm viau a, chutihrualin Real Kashmir winger Mohammad Iman a hnawksak viau. Iman hi dinglam kil aṭanga nawrtu a ni a, corner kick an hmuh ṭumah erawh defender lai paliante box chhunga an luh theih nan a hnungah a ding.

Right back Hyder Yousuf-a'n counter attack aṭangin a nawr nasa a, a ball pet a ṭha tel bawk. Yousuf hian box pawn aṭangin ṭum hnih ngawt goal ngei tura ngaih theihin kawh zetin a pet a, mah se Joel B. Lalramchhana'n hming chher nan a hmang. Ramchhana hi Namdhari an hmachhawn ṭumin che ṭha tawk lo mah se Real Kashmir lakah erawh man of the match-a thlan a ni a, Hriatpuia awm loh a lang lo.

Rinzuala goal a tawk lo

Mizo club-in first half-ah chance an nei meuh lo a, H. Lalrempuia cross Lalhriatpuia tauh fuh tawk loh erawh a uiawm takzet. Chutihrualin second half-ah erawh Lalrinzuala danglamna a lang.

Season liam taa I League-a Indian player goal khung tam ber Rinzuala hian mual laia Real Kashmir player ball a chhuhsak hnuah Augustine Lalrochana tan a pe a, Aizawl FC winger hian penetration ball ṭha zet pe lutin Rinzuala'n a um lut nghal a, minute 56-naah mawi zetin a pet goal.

Mizo club an khel a nghet a, goal khat an hum thei tura ngaih a ni. Mahse, minute 70-naah hliam vangin Rinzuala thlak a ngai a, hemi hnu pawh hian an la khel chhe lo. Minute 90 hnaihah Lalrempuia a inhliam leh a, hei erawh AFC-in an tuar takzet.

Rempuia hi a khelh chhunzawm theih loh avangin zawn chhuah a ni a, a thlaktu tur rawn luh hmain Real Kashmir-in goal an khung. Mohd Aqib-a ball vawrhluh chu substitute Mohammad Asrar Rehber-a'n tauhin keeper Ramchhana'n dang mah se a per chu Shahid Nazir-a'n minute 90-naah a khung.

Goal luh hnuah captain Ruatthara'n yellow card ṭum hnih a hmu a, an hnawk chhuak. Aizawl FC hi player 10-in an khel a, goal erawh an chhuah zui tawh lo, 1-1 in inkhel a tawp.

Mizo player an langsar

December 18, Nilaini tlai khan Churchill Brothers-in Dempo SC 2-0 in an hneh a, Goan club tana goal hmahruai khungtu chu Mizo tlangval Lalliansanga Renthlei a ni. Lunglei tlangval Liansanga hian Goan club hi loan hmangin Odisha FC aṭangin a zawm.

Nimin tlai khan Delhi FC-in Shillong Lajong 3-1 in an hneh a, Khawlailung tlangval K. Vanlalhriatzuala'n goal hmahruai a khung. Hriata hi MPL9-a Chawnpui champion puitu a ni a, MPL9 best midfielder a ni.