Bayern mualah RB Leipzig

Bundesliga-ah Bayern Munich an kal fal thei bik lo a, Vincent Kompany hoten kar liam taa Mainz an hneh loh avangin an hnuaia mite nen an la inhlat lo. Zanin dar 1:00 khan hian Allianz Arena-ah Bavarians-in an elpui team zinga mi RB Leipzig an mikhual dawn a, inkhel pawimawh a ni.

German football thununtu Bayern hian season liam ta khan nomawi an chawi lo a, an kawng daltu lian tak pakhat chu RB Leipzig hi an ni. Season bul ṭan nana khelh ṭhin DFL Supercup-ah Leipzig hian Bayern hi 3-0 in an sawp a, Bundesliga-ah pawh round rukna lekah Bayern nen 2-2 in an inhnehtawk. Thomas Tuchel-a leh a hote tan Leipzig hi an hnawksak pha.

Season liam ta khan Leipzig hi palinaah an awm a, tunah pawh table-ah palinaah an awm mek. Vincent Kompany hote hi hmahruai mektu ni mah se chesual thei an ni a, Mainz laka an chak loh avangin Allianz Arena-a inkhel tur pawh nise point hloh thei an ni.

Chutihrualin Mainz an hmachhawn ṭuma inhliam vanga khel thei lo Harry Kane a rawn kir thei tura ngaih a ni a, English striker a inlan theih chuan tlarhma a hriam sawt ang.

Kane hian league match 12 aṭangin goal 14 a khung thei a, goal hmaa a hriam em avangin a hmunruak luah khah a harsa. Chutihrualin Bayern tan Jamal Musiala a hmuhnawm ṭhin a, Germany international midfielder hian inelna hrang hrangah goal 13 khung tawhin khelmualah a hmuhnawm ṭhin bawk.

Crystal Palace aṭanga Bayern zawmtu Michael Olise pawh a club tharah a tlangnel viau a goal kua lai a khung tawh. Amaherawhchu, tun hmaa Bayern innghahna ni ṭhin Leroy Sane (4 goals), Kingsley Coman (4) leh Serge Gnabry (2) te goal hmaah an hriam tawk lo a, Bayern-in German football an thunun dawn a nih chuan tun aia an chet ṭhat a ṭul ang.

Bayern boss Vincent Kompany chuan, "Eng inkhel pawh ni se, chak ka duh. Kan chak loh zawh chiah hian chak châkna kan ngah leh zual a, kumina kan match hnuhnung berah hian chak ngei ka duh," tiin a sawi.