Arsenal chakna Jesus-a hattrick

Gabriel Jesus-a goal thum khung hmangin Arsenal chuan an mikhual Crystal Palace chu 3-2 in an hneh a, chak phu zawk ni chungin Carabao Cup semifinal an lut.

Emirates Stadium-a inkhelah Palace lamin minute lina lekah Jean-Philippe Mateta hmangin goal an nei hmasa, mahse Gunners hian striker Jesus-a hattrick hmangin an vaw let a, hun tawp dawna Eddie Nketiah goal khungin awmzia a nei phak tawh lo.

Goal thum chu

Nilaini zan inkhelah Arsenal hian a tir lamah goal khung an harsat - Raheem Sterling chuan ṭha zetin freekick pet mah se Dean Henderson chuan a lo dansak a, a hnuah pawh hnai tak aṭangin English goalkeeper hian Sterling khung tur a dansak bawk.

Captain Martin Odegaard-a hnen aṭanga a ball fing hmung chu Jesus hian chep deuh tak aṭangin a khung a, keeper Henderson a chip khum mawi hle, a hnuah Bukayo Saka siamsak chu chiang zetin a khung leh bawk a ni.

Brazilian striker hian a la duhtawk mai lo - Palace lamin si phurh sut an tum lutukna lamah tlarhnung an ngaihsak lo a, hmun awl zau laiah Odegaard chuan Jesus tan a lir lut a, ani hian chak zeta a tlanpui hnuah a goal thumna a khung.

Arteta beiseina

Jesus hian tun hnaiah goal khung a harsat - League Cup a khelh ṭhatna hi Premier League lamah chhawm ngei a tum ang, chutiang tur chuan manager Mikel Arteta pawhin a striker hi a beisei a ni.

Arteta chuan, "Jesus hian hun a mamawh a, kan pek a ngai. Inringtawk tak maia a khelh hi chuan danglamna siam thei tu a ni a," tiin a sawi a, tlarhma lamah Kai Havertz ten khelhna hmun an inchuh zui ang.

Manchester City striker hlui Jesus chuan, "Arsenal tan number 9 ka ha a nih chuan goal khung a ngai. Kai Havertz pawh tlarhma laia khel chi a ni a, kan pahnih hian khel phak zawk ni tur chuan goal khung a ngai," tiin a sawi.