Champion lai Liverpool an chak

League Cup-ah Liverpool chuan champion nomawi humhim ngei an tum tih an pholang a, semifinal lut turin Southampton chu khualmualah 2-1 in an hneh.

Liverpool tan tun season-a goal khung harsat Darwin Nunez chuan goal hmahruai a khung a, Harvey Elliott chuan a belhchhah ve leh bawk - Saints tana Cameron Archer goal khungin awmzia a nei phak lo.

Arne Slot enkawl Liverpool hian tun season inelna hrang hrangah match 24 khel tawhin, vawi khat chiah an la tlawm a, Premier League leh Champions League-ah table chung ber an luah mek a, League Cup quarterfinal-ah an chak leh ta.

Kha le Liverpool

Saints khelmualah Arne Slot-a'n an ṭhat dan berin team rem lo mah se, Liverpool tan chak turin harsatna a awm lo. Trent Alexander-Arnold-a'n Nunez tan through ball ṭha zet pein, minute 24-naah Uruguayan striker hian hmahruaina goal a khung.

Kum 25 mi Nunez tan tun season-a goal li a khung vena chiah a ni a, heti zat goal khung tur hian match 21 a mamawh - Saints laka a goal khung hian inrintawkna nasa tak a pe ang tih a chiang.

Liverpool hian an la duhtawk mai lo - minute 32-naah Harvey Elliott inlar ve lehin, tun season-a a vawi khat nana bul ṭan English midfielder hian an hmahruai nawnna goal ni turin a khung a, 2-0 in chawlhlawk an hmang.

Saints an buai

Premier League kai thar Southampton-in tun season-ah beisei an phak lo - English top flight league-ah table mawngphah an luah mek a, Pathianni zan khan Tottenham Hotspur chuan 5-0 ngawta sawpin coach Russell Martin an ban.

Saints hian coach lailawk Simon Rusk kaihhruaina hnuaiah tun season-a team 'form' bera chhal ngam Liverpool an mikhual a, an beidawng duh bik lo - minute 59-naah Archer chuan si phurh a sut ṭhen a, Liverpool player thiam loh a ni.

Mahse, Southampton an vannei tawk lo. Hun tawp dawnah penalty box hnaih takin freekick an hmuah an inngai a, mahse, referee Simon Hooper chuan Jarell Quansah chu Mateus Fernandes laka foul loah a ngai a, Liverpool an him.

A nem zawk!

Liverpool-in Pathianni zan league match-ah Tottenham Hotspur an lenchilh dawn a, hei hi hre ranin Slot-a'n player ṭha engemaw zat a khek - Mohamed Salah, Virgil van Dijk, Alisson Becker leh Dominik Szoboszlai te chu squad-ah pawh an awm lo.

Hei mai a ni lo. Coach Slot chuan hrem vangin khelmualah a naute a ho thei lo a, Alexander-Arnold, Joe Gomez leh Elliot goal khung tur siamsaktu Cody Gakpo te lakchhuah an ni bawk.

Kum 17 mi midfielder Trey Nyoni chuan senior team tan a vawi khat nan bul a ṭan a, kum 20 mi James McConnell, kum 18 mi forward Jayden Danns leh kum 22 mi defensive midfielder Tyler Morton te chu bench aṭanga luhtir an ni bawk.

An ṭha tawk

Liverpool tana a lawmawm lai chu Slot-a'n a player neih ṭhat ber thawhchhuahpui lo mah se, harsatna an tawk lo a, rei tak hliam vanga khelmuala lut tawh lo Konstantinos Tsimikas leh Federico Chiesa te bench aṭangin an lut bawk.

Chiesa hian goal khung theihna remchang a nei hial a, mahse, Italian forward 'shot' chu Taylor Harwood-Bellis chuan goal line aṭangin a lo chingfel a, Chiesa hian a ui khawp ang.

Liverpool tan Slot-a hnuaia hmun chang meuh lo Wataru Endo pawhin inkhel bul a ṭan a, centre back-ah Quansah nen inkawpin a khel ṭha thlawt.