Everton-in neitu thar an nei

Premier League club talbuai Everton chuan neitu thar an nei ta a, Friedkin Group chuan Merseyside club hi Farhad Moshiri hnen aṭangin an lei. An leina man zat hi tarlan ni chiah lo mah se, pound maktaduai 400 bawr vel niin a lang.

Toffees hi Premier League club zinga American sumdawng/company hnuaia awm 10-na chiah an ni. Friedkin Group hi Everton nen tak hi chuan September 23 khan an inrem daih tawh a, mahse, Premier League lamin nimin khan an pawmpui ve chiah a ni.

Texas lama inkulh Friedkin Group hi chairman Dan Friedkin-a kaihhruaina hnuaia awm niin, Friedkin hian Italian Serie A club AS Roma pawh a nei a, a hausakna hi £6.16tld lai niin Forbes chuan an tarlang.

British-Iranian sumdawng hausa Moshiri chuan kum 2016 khan Everton-ah hian 49.9% stake a lei a, hei hi kum 2022 khan 94.1% ah a tipung.

Moshiri hian club ropui tak din tumin sum pawh a seng nasa a, mahse, 1953–54 hnu lama top flight league aia hniam la khel ngai lo Everton hi tun hnai season thum chhungin tla thei dinhmunah an ding fo a, a hralh ta nge nge a ni.

Everton hi Friedkin Group hnuaia Roundhouse Capital Holdings hmingin lei a ni a, anni hian Moshiri-a 94% stake chu Blue Heaven Holdings kaltlangin an lei a, club ba leh engkim chinfel a nih hunah chuan an share hi 99.5% ah a chho ang.

Everton hian season tharah chuan an khelmual Goodison Park chhuahsanin, stadium thar, mipui 52,888 lenna Bramley-Moore Dock an luah dawn a, Friedkin Group chuan an team thuam chakin, sumdawnna leh kawng hrang hranga hmasawnna tur an dap tur thu an sawi.

Friedkin chu Everton-ah hian board Chairman thar a ni ang a, Marc Watts chu executive chairman niin, Friedkin Group-a chief financial officer Ana Dunkel pawh board-ah telin, Colin Chong chuan a aiawh tur ruat a nih hma chu chief executive dinhmun a luah lailawk chhunzawm ang.