Hyderabad-in Thangboi an ban

Indian Super League club Hyderabad FC chuan an coach Thangboi Singto nen an inṭhen thu an puang a, Manipur coach nen hian inhriatthiam tawnnaa inṭhen angin tarlan ni mah se, an ban niin a lang zawk mah.

Shillong Lajong coach hlui Thangboi hian Hyderabad hi tun season-ah league match 11 kaihruaiin, vawi hnih chiah hnehna a chanpui thei a, vawi khat draw an nei - table-ah 12-na dinhmun an luah mek.

Thangboi hian kum 2020 khan Hyderabad hi Assistant Coach leh Technical Director (Youth) hna chelh turin a zawm a, July 2023 khan coach nghet dinhmun luahin, Khalid Jamil dawta Indian coach ISL-a team enkawl thei a ni.

Hyderabad talbuai vanglai taka enkawltu niin, season hmasa phei chuan Indian player hlanga ISL match-a chak hmasa ber record a siam hial - Mizo player-te duhsaktu niin, tun season-ah pawh Mizo player kawl a nei nual.

Tun season ISL-ah Hyderabad hi Mizo player kawl tam pahnihna niin, Mizo player paruk an awm a, goalkeeper Lalbiakhlua Jongte, defender Laldanmawia, midfielder pathum Ramhlunchhunga, Isaac Vanmalsawma, Lalchhanhima Sailo leh forward Aron Vanlalrinchhana te an awm.