Real Madrid tan nomawi thar ber!

FIFA Intercontinental Cup final-ah Real Madrid-in harsatna an nei lo - Mexican club Pachuca chu 3-0 in an sawp a, FIFA hnuaia club inelna thar bera a champion hmasa ber an ni nghal.

Real tan hian Kylian Mbappe, Rodrygo leh Vinicius Jr (penalty) ten goal khat ṭheuh an khung a, North America champion Pachuca-in a chhanletna tur an neih loh avangin European champion lakah an zawr.

FIFA Intercontinental Cup hi kumin hi khelh a nih vawi khatna a ni a, FIFA Club World Cup chu kum li danah team tam zawk khelh tura ruahman a nih tak avangin, CWC thlak nana tih a ni - khawmualpui champion-te an inel.

Sulhnu leh lunglen

Carlo Ancelotti-a'n season laklawh laia inelnaah champion nomawi chawi ngei a duh avangin a neih ṭhat ber a thawhchhuahpui a, hliam damkawr Mbappe pawh hruai zingah telin, French forward hian Bellingham, Vinicius leh Rodrygo te nen bul an ṭan.

Mbappe tan an inkhelhna hmun Lusail Stadium, Qatar hi hmun thar a ni lo - World Cup 2022 final-a hattrick a siamna khelmual kha a ni a, Lionel Messi leh a ṭhiante ropui taka a hmingmawi tur an hliahkhuhna khelmual a ni bawk.

Real-a sawisel tawk reng, kum 26 mi Mbappe hian amah sawiseltute ka hupsak zuiin, minute 37-naah ṭha zetin goal hmahruai a khung. France captain hian tun season inelna hrang hrangah match 23 khelin, goal 13 a khungna chiah a ni.

Brazilian magic

1-0 in chawlhlawk hman a ni a, second half-ah goal hnih kan hmuh belh zui - ṭan aṭanga minute sarihna lekah Rodrygo chuan a 'class' pholangin mawi zetin a khung a, referee Jesus Valenzuela chuan VAR hmangin ennawn mah se, offside Jude Bellingham chu goal luhna turah a inrawlh loh avangin a pawmsak.

Real lakah Pachuca hian chance nei lo tawp an ni bik lo - captain Salomon Rondon-a freekick pet ṭha zet chu keeper Thibaut Courtois chuan ṭha zetin a dansak a, West Brom striker hlui Rondon hian uiawm takin a tauh over bawk.

Hun tawp nan minute ruk chauh a awm tawh tihah Vinicius a inlar ve leh a, FIFA-in khawvela footballer ṭha bera a thlan hlim hian Lucas Vazquez-a penalty hlawhchhuah chu goal-ah a chantir a, Qatar-ah Real an champion - Pathianni zan hian league match-ah Sevilla an mikhual zui ang!