Rilru lam harsatna ka paltlang - Nadal

Rafael Nadal chuan hliam vanga hun rei tak chhung tennis a khel mumal thei lo kha hrehawm a ti hle tih a sawi a, inkhelh a chawlhsan hma khan rilru lam harsatna a neih hial thu a sawi.

Spanish star hi khawvel tennis player ropui berte zinga mi a ni a, a hun tawp lamah erawh hliam vangin a buai hle a, season thum chhung vel chu inkhel mumnal thei loin a awm, chumi hnuah inkhelh a chawlhsan.

Grand Slam vawi 22 champion Nadal chuan, "Khelmual chhunga taksa hliam neih chu kan tawrh fo a ni a, ngaia neih theih ni chiah lo mah se a tawrh dan pawh ka thiam ve mai ṭhin.

"Mahse, khelmual chhunga hliam aiin rilru lama min hnawhtu a awm khan harsa ka ti zawk, a chang chuan ka hliam vang khan lungngai leh hrehawm ti em emin ka indawm kun a, thawk harsa tih chang pawh ka nei hial.

"Mahni tum leh chak ang ti thei loa awm kha a hrehawm a, mipui lamin min beiseina tih hlawhtlin theih loh kha a hrehawm lai chu a ni tel bawk. Amaherawhchu, inah awmin ka harsatna te kha zawimuangin ka hneh chho a, a tawpah chuan hnehtu ka ni," tiin a sawi.