Atalanta tan harsatna a awm lo
Serie A hmahruaitu Atalanta chuan Italian Cup lamah pawh result ṭha an nei chhunzawm - Nilaini zan khan second division club Cesena chu 6-1 ngawta sawp chungin quarterfinal an lut.
Atalanta tan hian Charles De Ketelaere leh Lazar Samardzic ten goal hnih ve ve an khung a, goal hnih dang chu Davide Zappacosta leh Marco Brescianini te khung a ni thung - Cesena tana substitute Joseph Ceesay goal khungin awmzia a nei lo.
Atalanta coach Gian Piero Gasperini-a'n rin loh dan tak maiin a player ṭha ho a luhtir a, a tir aṭanga inkhel thunun nghalin a tawp thlengin buaina an nei lo a, nuamsa takin last 16 an paltlang.
Gian Piero Gasperini chuan, "A tir aṭang khan inkhelah kan rilru zawng zawng kan seng a, match thunun tak chunga hnehna chan theih hi chu thil ṭha leh duhthusam a ni ṭhin.
"Chawl hman erawh kan ni dawn lo, tun kar tawp maiah hian Empoli nen kan inkhel zui leh dawn. Nomawi chawi tum kan nih chuan match zawng zawng kan ngai pawimawh tur a ni ang," tiin a sawi.
Inkhel dangah AS Roma chuan Sampdoria chu 4-1 in an lo hneh ve bawk a, coach thar Claudio Ranieri an neih hnuah Roma hian zawimuangin hma an sawn zel a, nomawi an chawi thut lo ang tih pawh sawi theih a ni ta lo.
Roma hi Como laka tlawm hlim kha an ni a, league lama an result an tlansan nghal thei hi an tan chanchin lawmawm a ni ang. Artem Dovbyk-a'n goal hnih a khung bakah Tommaso Baldanzi leh Eldor Shomurodov ten goal khat ve ve an khung bawk.
Ranieri-a'n a player ṭha ṭhenkhat - Saud Abdulhamid, Enzo Le Fee, Manu Kone, Stephan El Shaarawy leh Paulo Dybala te chu inkhel bul ṭantu zingah pawh a dah tel lo a, an ṭhat dan berin inlan lo mah se buaina an tawk chuang lo a ni.
Roma coach Ranieri chuan, "Roma hian hun a harsa a hmachhawn tih ka hria, chumi vanga kei hi min ko a ni tih pawh ka hria, kei chuan kan club ṭhatna turin theihtawp ka chhuah zel dawn.
"Hmasawn tur chuan vawi leh khata tih hluai theih a ni lo a, muangchan lutuk pawh a awm thei bawk. Tuna kan chakna aṭang pawh hian zirlai tam tak kan zir chhuak, tunah chuan beiseina nen hmalam kan thlir zel ang," tiin a sawi.
Thawhlehni zan khan Juventus chuan an mikhual Cagliari chu 4-0 a sawpin quarterfinal an lo lut ve tawh bawk a, nizan khan Inter Milan leh Udinese te inkhelin result kan hre hman lo thung.