Perez leh Red Bull inṭhen

Sergio Perez leh a team Red Bull te chuan an contract neih lai chu tihtawp an remti a, inremsiam tawnnain Perez hi a chhuak ang - khawthlang chanchinbu ṭhenkhat chuan an ban niin an ziak thung.

Mexican tlangval Perez hian season hmasa khan beisei a phak lo. Hnehna a chang miah lo a, dawhsan lawn phak chinah vawi li a awm, a chet ṭhat miau loh avangin a teammate Max Verstappen chu champion mah se, team inelna lamah Red Bull hian McLaren an phak ta lo a ni.

Kum 34 mi Perez chuan, "Red Bull nena kan thawhdunna hi ka tan chuan a hluin a ropui em em a, khawvela car intlansiakna sang ber kan hmachhawn ho dan hi theihnghilh theih a ni tawh lo ang," tiin a sawi.

Perez thlaktu tur hi tihchian a la ni lo, amaherawhchu tuna a lan dan chuan kum 22 mi Liam Lawson chuan a hmun ruak a luah a rinawm.