Bentancur-a'n hremna tuar tlang dawn

Tottenham Hotspur midfielder Rodrigo Bentancur chuan chi inthliarna lam hawi ṭawngkam a neih avanga hrem a nihna chu, tihtawisak turin Football Association-ah thlen mah se, FA chuan a hremna ang hian an kaltlangpui dawn.

Uruguay midfielder hian November thla khan Spurs tana a khelhpui, club captain Son Heung-min-a chungchang chu fiamthu thawh nan television-ah sawi langin, hei hi chi inthliarna lam do pawl leh thuneitute chuan an ngai thutak hle.

Bentancur leh Son hian inhriatthiam lohna nei loin, inngeih takin awm tho mah se, FA chuan a thubuai hi ngaihtuahin, match sarih atan an hrem. Bentancur hian match nga a tuar tawh a, match hnih a la bak chu pumpelh mai a inbeisei.

Mahse, a beisei angin thil a thleng ta lo a, nizan Carabao Cup-a Manchester United an hmachhawnah pawh a inlan thei lo a, Premier League-a Liverpool an hmachhawn turah a la inlan thei lo dawn bawk.

Juventus midfielder hlui Bentancur hremna hi tualchhung football atan chauh a ni a, Europa League lamah chuan a inlan thei.