Mudryk-a hma hun a chiang lo

Chelsea winger Mykhailo Mudryk chu tun hnai khan damdawi hman phal loh a lo hmang tih hmuhchhuah a ni a, Ukraine international erawhin he thil thleng hian a barakhaih takzet thu a sawi.

Premier League player-te hi damdawi hman phal loh an hman leh hman loh fiah nan an zun hi endik reng a ni ṭhin a, tun hnaia an endiknaah FA hian Mudryk-a zunah damdawi hman phal loh an hmu.

Chelsea chuan an player chungchangah hian FA-in an biak pawh tawh thu an sawi a, Mudryk-a'n test a fail chhan chu uluk taka an zirchian tur thu an sawi ve bawk.

Mudryk chuan, "Eng damdawi mah ka hman loh avangin ka thu hriat hian min ṭhawng takzet a, ka team-te nen he thil hi engtianga thleng nge a nih hriat tumin kan bei ang.

"Thil sual engmah ka ti lo tihah ka chiang a, khelmualah ka lo let leh thuai ka beisei," a ti. FA danah chuan drugs test paltlang lo player-te chu hrem lailawk theih an ni a, he thu buatsaih a nih thleng hian FA hian eng ang takin nge hremna an lekkawh dawn hriat a la ni lo.

Mudryk hi chuan a thil ei eng emawah hre loin damdawi hman phal loh telna ang chi a lo ei palh pawh a ni thei a, mahni duhthu renga hetiang hmangte chu kum li thleng FIFA danin hrem theih an ni.

Kum 23 mi Mudryk hi November 28 hnuah khan Chelsea tan a inlan leh tawh lo a, inelna hrang hrangah match nga zet a zawnin a khel lo tawh - coach Enzo Maresca chuan a player hi damlohna avanga inlan thei rih lo a nih thu a lo sawi tawh.

Maresca hian Mudryk-a lam an ṭan thu a sawi bawk a, Italian coach chuan, "Mykhailo hi kan thlawp tlat a, hre reng chunga intihchakna a hman kan ring lo," a ti a, an player an rintawk thu a sawi.