Donnarumma hmai a hliam!

Paris Saint Germain goalkeeper Gianluigi Donnarumma chu AC Monaco nen an inkhelhna lamah a hmai a hliam - Ligue 1 hmahruaitu hian an mikhualna ramah 4-2 in hnehna chu an chang ta tho a ni.

Stade Louis-II-a inkhelah Monaco defender Wilfried Singo chuan Donnarumma hi a tlawh a, hmun 10 laiah chilh a ngai hial, hun tawp hma minute 22 a la awm tihah Matvey Safonov chuan a rawn thlak a, goal an chhuah zui ta bik lo.

PSG manager Luis Enrique chuan, "Thil thleng kha ka va hmu chiang mai thei lo a, a hliam erawh a nain hmuh a nuam lo. Singo khan tih nat tuma tilui a ni kher lo ang, chutihrualin khelmual chhungah hian fimkhur taka chet erawh a ngai," a ti.

Paris club tan hian Ousmane Dembele chuan goal hnih a khung a, ani bakah hian Desire Doue leh Goncalo Ramos te chuan goal khat ve ve khung bawkin an team an chakpui.

Kumin chhungin PSG hian Ligue 1 match bik chu khelh tur an nei tawh lo, league match 16 an khelh aṭanga point 40 hmuin table hmahruaitu an ni a, anmahni hnaih bertu Marseille chuan point 30 an nei thung.

Enrique naute hian inelna hrang hranga kumina an match hnuhnung ber atan December 22, Pathianni zan hian French Cup round of 64 khel turin Lens an lenchilh ang.